Երեկ վարչապետ Նիկոլ Փաշինյանն ընդունել է ամերիկյան «Նյուզ Մաքս» մեդիա հոլդինգի հիմնադիր և գլխավոր գործադիր տնօրեն Քրիստոֆեր Ռուդիին։

Քրիս Ռուդին ամերիկացի լրագրող և մեդիա խոշոր գործարար է: Նա Newsmax Media լրատվական հարթակի հիմնադիրն ու գլխավոր գործադիր տնօրենն է։ Newsmax-ը համարվում է պահպանողական ուղղվածությամբ ամերիկյան 2-րդ խոշոր մեդիա պլատֆորմը։ 

Ռուդին ԱՄՆ նախագահ Դոնալդ Թրամփի հին ընկերը և երբեմն ոչ պաշտոնական խորհրդատուն է: Նրանց ծանոթությունը սկիզբ է առել 1990-ականներին՝ Նյու Յորքում։ 

Նա հաճախ է Թրամփին ուղեկցել իր նստավայր Mar-a-Lago-ում և մասնակցել նրա միջոցառումներին, օրինակ՝ Չինաստանի և Ճապոնիայի ղեկավարների հետ հանդիպումներին։ Մարալագոյի անդամ է։ Newsmax-ը Թրամփի նախագահության տարիներին դարձավ պահպանողական լսարանի առաջատար լրատվամիջոցներից մեկը։ 

Ռուդին ուղեկցել է Թրամփին Մեծ Բրիտանիա պետական այցի ժամանակ և մասնակցել է Բուքինգհեմյան պալատում կայացած պետական ընթրիքին։ Հանդիպումներ է ունեցել Իսրայելի, Ուկրաինայի, Սերբիայի, Մեծ Բրիտանիայի առաջնորդների հետ։ Ռուդին նաև Բիթ Քլինթոնի ընկերն է և ժամանակին նաև Քլինթոնին էր ուղեկցում։

Քրիստոֆեր Ռուդին վարչապետի հետ հանդիպման ընթացքում ընդգծել է, որ «Նյուզ Մաքս»-ը հետաքրքրված է Հայաստանի քաղաքական, տնտեսական և տարածաշրջանային գործընթացների լուսաբանմամբ։ Նա նշել է, որ մեդիա հոլդինգը կարևորում է Հայաստանի կառավարության՝ խաղաղությանն ու կայունությանը միտված քայլերը և պատրաստակամ է տեղեկատվական ոլորտում արդյունավետ համագործակցության։

Զրուցակիցներն անդրադարձել են նաև միջազգային տեղեկատվական միջավայրում Հայաստանի ներկայության ընդլայնման, պետական հաղորդակցության արդյունավետության բարձրացման և ապատեղեկատվության դեմ պայքարի ուղղությամբ համագործակցության հնարավորություններին։

Այցը կարևոր էր՝ ընդգծելու նաև Թրամփի շրջապատի աջակցությունը ՀՀ կառավարությանը: Ռուդիի այցով ԱՄՆ պահպանողական/հանրապետական շրջանակներին լավ ուղերձ է գնում, որ չկա Հայաստանում խնդիր քրիստոնեական/կրոնական ազատության մասով։ Նաև ակնհայտ է դառնում, որ ԱՄՆ-ում նման կարծիքներ ու տրամադրություններ չկան, հակառակ դեպքում Ռուդին Հայաստան չէր այցելի։