Անվտանգային քաղաքականության հետազոտական կենտրոնի փորձագետ Ռոբերտ Ղևոնդյանի կարծիքով՝ շատ մեծ հավանականությամբ Վաղարշապատի ընտրությունները 2026 թվականի խորհրդարանական ընտրությունների նախատիպն էին: «Նման պատկեր ենք տեսնելու՝ պլյուս-մինուս տոկոսներ։ Ընդ որում՝ նման պատկեր ենք տեսնելու ոչ միայն արդյունքների  առումով, այլև ընտրարշավի, ուժերի՝ մեկը մյուսի նկատմամբ դիրքավորումների»,- Civic.am-ի տաղավարում ասաց նա։

Մեր զրուցակցի դիտարկմամբ՝  ցանկալի կլիներ, որ ընտրությունների արդյունքում ավագանիում ներկայացված լիներ ևս մեկ կուսակցություն, որը ո՛չ իշխող ուժի թևից կլիներ, ոչ էլ ռուսամետների: «Արևմտամետների այս փորձը ևս անհաջող էր, ինչը նորից կկրկնվի խորհրդարանական ընտրությունների ժամանակ, և նրանց մի փոքր ձայն չի հերիքի խորհրդարանում ներկայացված լինելու համար»,- նկատեց նա։

Ղևոնդյանի խոսքով՝   խնդիրն այն է, թե արդյոք արևմտամետները գոնե հիմա կսկսե՞ն պատրաստվել  2031 թվականի ընտրություններին: «Ես սրա մասին ասել եմ 2021-ին ու 2023 թվականներին՝ անձնական ու հանրային հանդիպումների ժամանակ, առ այն, որ պետք է հիմիկվանից պատրաստվել ՔՊ-ռուսամետներ կոնյունկտուրան փոխելու համար։ Պետք է ամրագրենք, որ 2026 թվականին ՔՊ-ն կկարողանա  նորից միայնակ իշխանություն կազմել, խնդիրն այն է՝ արդյոք հնարավոր կլինի՞ փոխել ԱԺ կոնյունկտուրան»,- ասաց նա։

Փորձագետը նկատում է՝ քաղաքական դաշտում կան ուժեր, որոնք ընտրություններից մեկ-երկու տարի առաջ հայտարարում են, որ գնում են իշխանություն վերցնելու: «Նմանատիպ որոշ ուժեր բացարձակապես չեն ուզում շեմ հաղթահարել, գործում են կա՛մ ամեն ինչ, կա՛մ ոչինչ սկզբունքով։ Սակայն իշխանություն վերցնելու համար առաջին հերթին պետք է կարողանաս շեմը  հաղթահարել»,- եզրափակեց նա։

Մարիամ Գրիգորյան

Հարցազրույցն ամբողջությամբ՝ տեսանյութում