Եվրամիությունում թույլատրելի են համարել Գրենլանդիայի հարցում զիջումների գնալու հնարավորությունը՝ Ուկրաինայի համար ԱՄՆ-ի կողմից անվտանգության երաշխիքներ ստանալու դիմաց։ Այս մասին հայտնում է Politico պարբերականը՝ հղում անելով եվրոպացի դիվանագետներին։

Ըստ աղբյուրների՝ ԵՄ երկրները, ներառյալ Դանիայի դաշնակիցները, չեն սատարում Գրենլանդիայի անջատմանը Կոպենհագենից։ Սակայն Բրյուսելում քննարկում են փոխզիջումային տարբերակ Վաշինգտոնի մասնակցությամբ։

Հնարավոր սցենարներից մեկը կոչվում է «անվտանգության փաթեթ»։ Դրա շրջանակներում Եվրոպան կարող է համաձայնել Գրենլանդիայում ԱՄՆ-ի դերի ընդլայնմանը։ Փոխարենը Վաշինգտոնը պետք է Ուկրաինային տրամադրի երկարաժամկետ և հաստատուն անվտանգության երաշխիքներ։

Politico-ի աղբյուրները նշում են, որ նման տարբերակը համարում են տհաճ, բայց նվազ ռիսկային։ Այլընտրանքը կարող է լինել բացահայտ հակամարտությունը Դոնալդ Թրամփի վարչակազմի հետ, ներառյալ ճնշումը ԵՄ-ի վրա և Ուկրաինայի հարցում ԱՄՆ դիրքորոշման փոփոխությունը։

Հունվարի 8-ին Politico-ն գրել էր, որ եվրոպական երկրները սկսել են փուլ առ փուլ մշակել արձագանքման սցենարներ՝ Գրենլանդիայի նկատմամբ ԱՄՆ-ի հնարավոր գործողությունների վերաբերյալ։ ԵՄ-ում և ՆԱՏՕ-ում այլևս չեն համարում Թրամփի հայտարարությունները զուտ «հռետորական ճնշում» և իրավիճակը դիտարկում են որպես իրական սպառնալիք եվրոպական անվտանգությանը։