ՌԴ արտաքին գործերի նախարարությունը «լուրջ մտահոգություն» է հայտնել Ատլանտյան օվկիանոսում ԱՄՆ զինվորականների կողմից Bella 1 («Մարիներա») նավթի լցանավի կալանման կապակցությամբ: ՌԴ ԱԳՆ-ի կարծիքով՝ դա եղել է նավի դեմ «անօրինական ուժային ակցիա»:

Գերատեսչությունը հայտարարել է, որ լցանավը դեռևս դեկտեմբերի 24-ին ստացել է Ռուսաստանի դրոշի ներքո նավարկելու ժամանակավոր թույլտվություն և իրականացրել է «խաղաղ անցում» Հյուսիսային Ատլանտիկայի միջազգային ջրերում՝ ուղղություն վերցնելով դեպի ռուսական նավահանգիստներից մեկը: ԱՄՆ-ը, ինչպես պնդում է ՌԴ ԱԳՆ-ն, բազմիցս տեղեկություններ է ստացել լցանավի ռուսական պատկանելության և դրա «քաղաքացիական խաղաղ կարգավիճակի» մասին:

ՌԴ արտաքին գործերի նախարարությունը նշել է, որ բաց ծովում նավը կանգնեցնելը և զննելը հնարավոր է միայն սահմանափակ թվով հիմքերով, ինչպիսիք են ծովահենությունը կամ մարդկանց վաճառքը, ինչը չի վերաբերում Bella 1-ին: Այլ դեպքերում նման գործողությունները թույլատրվում են միայն դրոշի պետության համաձայնությամբ. Ռուսաստանը նման համաձայնություն չի տվել և արտահայտել է պաշտոնական բողոք ԱՄՆ իշխանություններին՝ կապված ԱՄՆ առափնյա պահպանության կողմից լցանավի հետապնդման հետ, հավելել է ՌԴ ԱԳՆ-ն: 

«Այս պայմաններում ամերիկացի զինվորականների կողմից բաց ծովում խաղաղ նավը կալանելը և դրա փաստացի առգրավումը, ինչպես նաև անձնակազմի գերեվարումը չի կարող մեկնաբանվել այլ կերպ, քան միջազգային ծովային իրավունքի հիմնարար սկզբունքների և նորմերի, ինչպես նաև նավարկության ազատության կոպիտ խախտում: Սա նավի սեփականատիրոջ օրինական իրավունքների և շահերի էական խախտում է: Սպառնալիքի տակ են դրվել «Մարիներա»-ի անձնակազմի կյանքն ու առողջությունը, որի կազմում են մի քանի երկրների քաղաքացիներ: Մենք բացարձակապես անընդունելի ենք համարում ամերիկյան իշխանությունների կողմից նրանց դեմ ուղղված դատական ​​հետապնդման սպառնալիքները՝ անհեթեթ պատրվակներով»,- ասվում է ՌԴ ԱԳՆ հայտարարության մեջ:

Մոսկվայի վարկածով՝ ԱՄՆ-ի և այլ արևմտյան երկրների սահմանափակող միջոցները կրում են «անօրինական բնույթ»։ ՌԴ ԱԳՆ-ն «ափսոսանք և տագնապ» է հայտնել Վաշինգտոնի կողմից «սուր միջազգային ճգնաժամային իրավիճակներ գեներացնելու պատրաստակամության» կապակցությամբ։

Ռուսաստանի արտգործնախարարությունը կոչ է արել ԱՄՆ-ին «վերադառնալ միջազգային ծովային նավագնացության հիմնարար նորմերին ու սկզբունքներին հետևելուն և անհապաղ դադարեցնել անօրինական գործողությունները» լցանավի դեմ։