Սև ծովում՝ Թուրքիայի ափերի մոտ, անօդաչուի հարձակման հետևանքով վնասվել է «Էլբուս» (Elbus) նավթի լցանավը, որը նավարկում էր Պալաուի դրոշի ներքո: Այս մասին հայտնում են թուրքական լրատվամիջոցները, այդ թվում նաև Haberturk-ը:

Նրանց տեղեկություններով՝ վնասվել է լցանավի վերին հատվածը։ Հարձակումը տեղի է ունեցել Կաստամոնու նահանգի Աբանա շրջանից 30 ծովային մղոն (55.6 կիլոմետր) հեռավորության վրա։

Հարձակումից հետո նավը աղետի ազդանշան է ուղարկել, որին արձագանքել են Թուրքիայի առափնյա պահպանության աշխատակիցները և լցանավը քարշակով տարել Ինեբոլուի նավահանգիստ։ Նավը ներկայումս խարիսխ է գցել այնտեղ՝ սպասելով վնասի գնահատմանը։

Թուրքական լրատվամիջոցները չեն հաղորդել՝ ուր կամ որտեղից էր ուղևորվում «Էլբուսը»։ Ուկրաինական «Օպերատիվնիյ ԶՍՈՒ» Telegram-ալիքը պնդում է, որ խոսքը Ռուսաստանի ստվերային նավատորմին պատկանող լցանավի մասին է, որն ուղևորվում էր Նովոռոսիյսկ՝ բեռնման համար։ Այն մասին, որ նավը «ստվերային նավատորմից» է, գրում են նաև Z-բլոգերները։