Ռուսական
զորքերը բալիստիկ հրթիռով, հավանաբար «Օրեշնիկ»-ով, հարվածել են Լվովում
կարևորագույն ենթակառուցվածքային օբյեկտին։
Հարվածի
մասին հայտնել է Լվովի քաղաքապետ Անդրեյ Սադովոյը: Նրա խոսքով՝ օդային տագնապ հայտարարելուց
հետո Լվովում մի շարք պայթյուններ են լսվել։ Ավելի ուշ նա գրել է կարևորագույն
ենթակառուցվածքային օբյեկտի վրա հարձակման մասին։ «Դեռևս հայտնի չէ՝ արդյոք դա
«Օրեշնիկ» հրթի՞ռ էր։ Տեղեկատվություն կտրամադրեն զինվորականները»,- հավելել է նա։
Հարվածի հետևանքով տուժածների մասին չի հաղորդվում։
Ավելի
ուշ ՌԴ ՊՆ-ն հայտարարություն է տարածել, որով հաստատել է, որ Լվովի վրա հարձակումն
իրականացվել է «Օրեշնիկ» հրթիռով:
«Այս
գիշեր, ի պատասխան Կիևի ռեժիմի կողմից Նովգորոդի մարզում 2025 թվականի դեկտեմբերի
29-ի գիշերը Ռուսաստանի նախագահի նստավայրի վրա իրականացված ահաբեկչական
հարձակման, ՌԴ ԶՈՒ-ն ցամաքային և ծովային բարձր ճշգրտության մեծ հեռահարության
զենքերով, այդ թվում՝ «Օրեշնիկ» միջին հեռահարության ցամաքային շարժական հրթիռային
համակարգով, ինչպես նաև անօդաչու թռչող սարքերով զանգվածային հարված է հասցրել
Ուկրաինայի տարածքում չափազանց կարևոր օբյեկտներին:
Հարվածը
թիրախներին է հասել: Վնասված են անօդաչու թռչող սարքեր արտադրող օբյեկտները, որոնք
օգտագործվել են ահաբեկչական հարձակման ընթացքում, ինչպես նաև էներգետիկ
ենթակառուցվածքները, որոնք ապահովում են Ուկրաինայի ռազմարդյունաբերական համալիրի
աշխատանքը:
Հանցավոր
ուկրաինական ռեժիմի կողմից ցանկացած ահաբեկչական գործողություն այսուհետ ևս չի մնա
առանց պատասխանի»,- ասվում է հայտարարության մեջ:
