Ուկրաինայի նախագահ Վլադիմիր Զելենսկին հայտարարել է, որ քննարկում է ԱՄՆ-ի հետ ազատ առևտրի հնարավոր համաձայնագիրը՝ որպես երկրի վերականգնմանն ուղղված միջոցառումների լայն փաթեթի մաս։ Այս մասին հայտնում է Bloomberg գործակալությունը։
Համաձայնագիրը նախատեսում է զրոյական մաքսատուրքեր Վաշինգտոնի հետ առևտրում և կտարածվի Ուկրաինայի որոշ արդյունաբերական զարգացած տարածաշրջանների վրա՝ երկրին տրամադրելով «շատ լուրջ առավելություններ» և ներգրավելով ներդրումներ ու բիզնես, պարզաբանել է ուկրաինացի առաջնորդը։
Զելենսկին ընդգծել է, որ անհրաժեշտ է առաջարկի մանրամասները անձամբ քննարկել նախագահ Դոնալդ Թրամփի հետ։ Նա կարծում է, որ նման համաձայնագիրը կծառայի որպես տնտեսական անվտանգության լրացուցիչ երաշխիք։
Ուկրաինան իր դիտարկումներն է ներկայացրել տարածքային առաջարկների վերաբերյալ ամերիկյան բանակցային թիմին։ Սպասվում է, որ Վաշինգտոնը դրանք կփոխանցի ռուսական կողմին՝ մեկնաբանություններ ստանալու համար։
Զելենսկին հույս ունի ստանալ Ռուսաստանի պատասխանը 20 կետից բաղկացած շրջանակային համաձայնագրի վերաբերյալ մինչև ամսվա վերջ, երբ կավարտվի Թրամփի հետ անվտանգության երաշխիքների և վերականգնման պլանի համաձայնեցումը։ Դրանից հետո նախատեսվում է հանդիպում Սպիտակ տան ղեկավարի հետ կամ ԱՄՆ-ում, կամ Դավոսում (Համաշխարհային տնտեսական ֆորումի շրջանակում՝ հունվարի 19-23-ը)։
Ազատ առևտրի համաձայնագրի կնքման արագացումը այն խաղաղության պլանի կետերից մեկն էր, որը առաջնորդները քննարկել էին դեկտեմբերի վերջին Ֆլորիդայում։
Թրամփի խոսքով՝ հարցերի 95%-ն արդեն համաձայնեցված է։ ԱՄՆ նախագահը նշել է, որ եվրոպական երկրները իրենց վրա կվերցնեն Ուկրաինայի անվտանգության երաշխիքների մեծ մասը։ Զելենսկին Թրամփին առաջարկել է Կիևին տրամադրել մինչև 50 տարի ժամկետով անվտանգության երաշխիքներ։
«Նախագահն ասաց, որ կմտածի»,— նշել է նա։
Մոսկվայում, սակայն, դժգոհություն են հայտնել նոր պլանի որոշ դրույթների վերաբերյալ։ ՌԴ նախագահի օգնական Յուրի Ուշակովը հայտարարել է, որ ուկրաինացիների և եվրոպացիների կողմից մտցվող դրույթները «ոչ մի լավ բան չեն ավելացնում»։
