ԱՄՆ նախագահ Դոնալդ Թրամփը վաղը Ազգային անվտանգության խորհրդի հետ կքննարկի Իրանի նկատմամբ հնարավոր գործողությունները, հաղորդում է CNN-ը։

Հեռուստաալիքի երկու աղբյուրների տեղեկություններով՝ Սպիտակ տունը քննարկում է մի շարք հնարավոր միջոցներ՝ Իրանի իշխանությունների կողմից զանգվածային բողոքի ցույցերի կոշտ ճնշման ֆոնին։ Քննարկվող տարբերակներից են Իրանի անվտանգության կառույցներին հարվածները, որոնք գործի են դրվել ցույցերը ցրելու համար, ռեժիմի զինվորականների և օբյեկտների դեմ կիբերգործողությունները, նոր պատժամիջոցների սահմանումը իշխանության ներկայացուցիչների և տնտեսության հիմնական ոլորտների, այդ թվում՝ էներգետիկ և բանկային ոլորտի նկատմամբ։ Քննարկվում է նաև ցուցարարներին ինտերնետ հասանելիության ապահովումը, այդ թվում՝ Starlink-ի միջոցով։

Սպիտակ տան բարձրաստիճան պաշտոնյան ընդգծել է, որ Իրան ամերիկյան զորքեր մտցնելու մասին չէ խոսքը:

Միաժամանակ Թրամփը հայտարարել է, որ եթե Թեհրանը հարձակվի ամերիկյան բազաների վրա, Վաշինգտոնը կհարվածի Իրանին աննախադեպ ուժով։ Պատասխանելով լրագրողների հարցերին՝ Թրամփը հաստատել է, որ իր վարչակազմը կապի մեջ է Իրանի ընդդիմության առաջնորդների հետ։ Նրանց փոխանցվող ուղերձի մասին հարցին Թրամփը հայտարարել է. «Կիմանաք»։

Թրամփի խոսքով՝ Իրանը բանակցություններ է խնդրել, և հանդիպումն արդեն պատրաստվում է, բայց Վաշինգտոնը, հնարավոր է, ստիպված լինի գործել մինչ դրա անցկացումը՝ հաշվի առնելով երկրում տեղի ունեցող զարգացումները։

ԱՄՆ նախագահը հայտարարել է, որ Իրանը սկսում է հատել Վաշինգտոնի «կարմիր գծերը»։ Նրա խոսքով՝ ամերիկյան վարչակազմը քննարկում է գործողությունների «շատ լուրջ տարբերակներ»՝ նշելով զանգվածային բողոքի ցույցերի ժամանակ խաղաղ բնակիչների մահերը։

Թրամփը ընդգծել է, որ ԱՄՆ շահերի վրա ցանկացած հարձակում կհանդիպի «ճնշող ուժի»՝ հասկացնելով, որ Վաշինգտոնը պատրաստ է կոշտ պատասխանի հետագա էսկալացիայի դեպքում։