Վրաստանի նախկին վարչապետ Իրակլի Ղարիբաշվիլին մեղավոր
է ճանաչվել անօրինական եկամուտների օրինականացման գործով և համաձայնություն կնքել դատախազության
հետ։
Ըստ գործարքի պայմանների, հաղորդել է Վրաստանի գլխավոր
դատախազությունը, Ղարիբաշվիլին դատապարտվել է հինգ տարվա ազատազրկման և տուգանվել
1 միլիոն լարիով (մոտավորապես 319 հազար եվրո)։
«Նա նաև հօգուտ պետության կզրկվի դրամական միջոցներից,
որոնք ստացվել են հանցավոր գործունեության արդյունքում, և նրա բնակարանի խուզարկության
ժամանակ առգրավվածից»,- ասվում է գլխավոր դատախազության տարածած հաղորդագրության մեջ։
2025 թվականի հոկտեմբերին հաղորդվել էր, որ Ղարիբաշվիլիի,
նախկին գլխավոր դատախազ Օթար Պարցխալաձեի, Պետական անվտանգության ծառայության նախկին
ղեկավար Գրիգոլ Լիլուաշվիլիի և նրանց մտերիմ ևս ութ անձանց խուզարկությունների ժամանակ
առգրավվել է ավելի քան յոթ միլիոն դոլար և մոտ 140 միլիոն լարի կանխիկ, ինչպես նաև
արվեստի գործեր և թանկարժեք իրեր, այդ թվում՝ ժամացույցներ։
