ԱՄՆ նախագահ Դոնալդ Թրամփի հատուկ բանագնաց Սթիվ Ուիթքոֆը թվարկել է Վաշինգտոնի պահանջները Թեհրանին, որոնք անհրաժեշտ է ներառել դիվանագիտական համաձայնագրում՝ երկրների միջև լարվածությունը նվազեցնելու համար։ Այս մասին հայտնում է The Times of Israel պարբերականը։
Ըստ նրա՝ համաձայնագիրը պետք է ընդգրկի չորս առանցքային հարց.
Ուրանի հարստացման մակարդակը. Խիստ սահմանափակումների հաստատում։
Հրթիռային զինանոց. Իրանի հրթիռային պաշարների կրճատում։
Միջուկային նյութեր. Կուտակված միջուկային նյութերի կառավարում և վերահսկողություն։
Տարածաշրջանային ազդեցություն. Մերձավոր Արևելքում պրոիրանական խմբավորումների գործունեության դադարեցում կամ սահմանափակում։
Պատասխանելով ԱՄՆ զինված ուժերի կողմից Իրանին հնարավոր հարված հասցնելու մասին հարցին՝ հատուկ բանագնացը նշել է, որ հույս ունի հակամարտությունը լուծել դիվանագիտական ճանապարհով։ Ամերիկացի քաղաքական գործչի կարծիքով՝ Թեհրանը կարող է գնալ փոխզիջման՝ երկրում տիրող սոցիալ-տնտեսական ծանր իրավիճակի պատճառով։
Ուիթքոֆը նաև հավելել է, որ Իրանում բողոքի ակցիաների մասնակիցները «անհավանական քաջ մարդիկ են» և ընդգծել է իր համերաշխությունը նրանց հետ։
Ավելի վաղ Սպիտակ տան պաշտոնական ներկայացուցիչ Քերոլայն Լևիթը հայտարարել էր, որ նախագահ Դոնալդ Թրամփը ուշադիր հետևում է Իրանում տեղի ունեցող բողոքի ցույցերին։ Նրա խոսքով՝ ԱՄՆ կառավարությունը նախագահի հետ միասին դիտարկում է իրադարձությունների զարգացման բոլոր հնարավոր տարբերակները։
