Եվրամիության որոշ անդամ պետություններ դեմ են Ուկրաինայի հակամարտության կարգավորման շրջանակներում քննարկվող Կիևի՝ 2027 թվականին ԵՄ-ին անդամակցելու գաղափարին։ Այս մասին հայտնում է Financial Times թերթը։

Ավելի վաղ Washington Post-ը, հղում անելով ուկրաինացի և ամերիկացի պաշտոնյաներին, տեղեկացրել էր, որ 2027 թվականին Ուկրաինայի՝ ԵՄ անդամ դառնալու հնարավորությունը քննարկվում է կարգավորման շուրջ ընթացող բանակցություններում, սակայն դա անհանգստացնում է որոշ եվրոպական պետությունների։

«ԱՄՆ-ի գլխավորությամբ ընթացող բանակցություններում քննարկվող կարգավորման 20 կետից բաղկացած պլանի նախնական նախագծերը մատնանշում էին 2027 թվականը որպես Ուկրաինայի անդամակցության ժամկետ։ Սակայն այս հարցը ներկայումս քննարկման փուլում է՝ ԵՄ որոշ երկրների առարկություններից հետո», — նշված է FT-ի նյութում։

Ուկրաինայի փոխվարչապետ Տարաս Կաչկան հրատարակությանը տված հարցազրույցում խոստովանել է, որ Եվրամիությանը Ուկրաինայի միանալու ամսաթիվը «դեռևս» համաձայնեցված չէ։