Հայաստանը պետք է հաշվի առնի այն փաստը, որ ԵՄ-ն
վերածվում է ռազմաքաղաքական միության՝ Ռուսաստանի նկատմամբ ագրեսիվ տրամադրվածությամբ:
Այս մասին լրագրողներին հայտնել է Ռուսաստանի փոխվարչապետ Ալեքսեյ Օվերչուկը։
Նրա խոսքով՝ Երևանի համար կարևոր է գիտակցել, որ
ԵՄ-ն ավելի ու ավելի է հեռանում տնտեսական բլոկի մոդելից։
«Հայերը պատրա՞ստ են միանալու ռազմաքաղաքական միությանը։
Հայերը երևի պետք է այդ հարցը իրենց տան»,- հավելել է նա։
Օվերչուկը նաև նշել է, որ Հայաստանը հասկանում է
Եվրասիական տնտեսական միության (ԵԱՏՄ) հետ կապերի կարևորությունը, դրանց խզումը կազդի
երկրի տնտեսության վրա։
«Եվրասիական միությունը Հայաստանի ամենակարևոր տնտեսական
գործընկերն է և կմնա այդպիսին նաև մոտ հեռանկարում։ Ավելին, մենք տեսնում ենք, որ Հայաստանը
ակտիվորեն զարգացնում է կապերը ոչ միայն Ռուսաստանի, այլև Եվրասիական տնտեսական միության
մյուս անդամների, մասնավորապես՝ Ղազախստանի հետ»,- ասել է Ռուսաստանի փոխվարչապետը։
Միևնույն ժամանակ, Հայաստանում զգալի թվով մարդիկ
կան, այդ թվում՝ երկրի ղեկավարության մեջ, որ ցանկանում են մերձենալ Եվրամիությանը,
ասել է Օվերչուկը։
«Նրանք բացարձակապես իրատես են այս հարցում և հասկանում
են Եվրասիական տնտեսական միության հետ կապերի կարևորությունը իրենց երկրի բարեկեցության
համար։ Կա հասկանալի ձգտում՝ դիվերսիֆիկացնել իրենց տնտեսությունը և առևտրային կապերը։
Սա նույնպես հասկանալի, նորմալ ձգտում է, երբ երկիրը ցանկանում է զարգացնել կապերը
այլ երկրների հետ, և դրան նույնպես պետք է համապատասխան կերպով վերաբերվել»,- ասել
է նա։
