22-ամյա Պարգև Հակոբյանի կյանքն ընդհատվել է Էջմիածնում Գոջի մականունն ունեցող Արման Առաքելյանի որդիների կողմից դաժան ծեծի ենթարկվելուց 13 օր անց՝ Երևանի  «Սուրբ Գրիգոր Լուսավորիչ» բժշկական կենտրոնում, որտեղ այդպես էլ ուշքի չի եկել։ Դեպքը տեղի է ունեցել 2025 թվականի ապրիլի 23-ին։

Մայրը՝ Աիդա Գրիգորյանը, հիշելով դեպքի օրը,  պատմում է՝ ավագ որդուց է զանգ ստացել  ու շտապել հիվանդանոց՝  արդեն այնտեղ իմանալով մանրամասները։ Հորդառատ անձրև է տեղացել,  ձախ շրջադարձ կատարելիս Պարգևը  հանկարծակի ջրել է հարևան մեքենան, որի լուսամուտները բաց են եղել։  Հետապնդել են, մի քանի հոգով  պատճառել կյանքի հետ անհամատեղելի մարմնական վնասվածքներ։

Տիկին Աիդան նշում է՝ դժգոհ է Վաղարշապատի իրավապահների աշխատանքից, 13 օր շարունակ մեղավորներին չեն հայտնաբերել, ինքն է բողոքել և  հասել նրան, որ գործը տեղափոխեն Երևան։ Դեմ է նաև առաջադրված մեղադրանքին։ Դիմում է վարչապետին՝ խնդրանքով, որ որդու սպանության մեղավորները պատժվեն ամենախիստ ձևով։