ԱՄՆ-ն երկուշաբթի օրը Մերձավոր Արևելք է տեղափոխել հինգերորդ սերնդի հավելյալ 18 միավոր F-35A Lightning II «ստելս» կործանիչներ՝ ավիացիոն խմբավորումն ուժեղացնելու նպատակով։ Այս մասին հայտնել է Itamilradar պորտալը։

Ամերիկյան կործանիչները օդ են բարձրացել Մեծ Բրիտանիայի Լեյքենհիթ ավիաբազայից։ Նրանց թռիչքը դեպի Մերձավոր Արևելք ապահովել են KC-135 Stratotanker լիցքավորող ինքնաթիռները։ Ինչպես նշում է պորտալը, սա ամերիկյան մարտական ավիացիայի՝ դեպի տարածաշրջան խոշորագույն միաժամանակյա տեղափոխումներից մեկն է։ Դրա մասշտաբները վկայում են Մերձավոր Արևելքում ԱՄՆ ռազմական ներուժի կտրուկ աճի մասին՝ Իրանի հետ հարաբերություններում լարվածության ֆոնին։

Այս ինքնաթիռները միացել են 12 միավոր F-35A կործանիչներին, որոնք ավելի վաղ՝ փետրվարին, ԱՄՆ-ից տեղափոխվել էին Հորդանանի Մուվաֆակ Սալթի ավիաբազա։

Նոր ինքնաթիռների ժամանումից հետո ԱՄՆ-ն Մերձավոր Արևելքում այժմ տնօրինում է հետևյալ օդային ուժերը.

• 30 միավոր F-35A կործանիչ,

• 2 էսկադրիլիա F-15E Strike Eagle (24 ինքնաթիռ),

• 1 էսկադրիլիա A-10 Thunderbolt II գրոհիչ (12 ինքնաթիռ)։

Տարածաշրջանի բազաներում ամերիկյան մարտական ինքնաթիռների ընդհանուր թիվը հասնում է մոտ 66 միավորի։

Բացի այդ, USS Abraham Lincoln ավիակրի վրա, որը գտնվում է Արաբական ծովում՝ Իրանի մոտակայքում, տեղակայված են.

• 1 էսկադրիլիա F-35C Lightning II կործանիչներ,

• 3 էսկադրիլիա F/A-18E/F Super Hornet կործանիչներ (յուրաքանչյուրում՝ մոտ 12 ինքնաթիռ)։