2026 թվականի փետրվարի 19-ին, «Խաղաղության խորհրդի» անդրանիկ նիստին մասնակցելու նպատակով Ադրբեջանի Հանրապետության նախագահ Իլհամ Ալիևի՝ Ամերիկայի Միացյալ Նահանգներ կատարած այցի շրջանակներում, մի խումբ ցուցարարներ սադրիչ գործողություններ են իրականացրել Վաշինգտոնի «Waldorf Astoria» հյուրանոցի դիմաց։ Այս մասին ասված է ԱՄՆ-ում Ադրբեջանի դեսպանատան հայտարարության մեջ։
Հայտարարության մեջ նշվում է, որ երբ Նախագահի ավտոշարասյունը մոտեցել է հյուրանոցի տարածքին, ցուցարարները փորձել են ուժով ներխուժել պահպանվող գոտի և հարձակվել Նախագահի ավտոմեքենայի վրա
«Այս խումբը նաև վիրավորական արտահայտություններ է հնչեցրել Ադրբեջանի ղեկավարության հասցեին։ Հաշվի առնելով, որ պետության ղեկավարի պահպանվող տրանսպորտային միջոցի տեղաշարժի խոչընդոտումը կամ ֆիզիկական միջամտությունը լուրջ սպառնալիք են ստեղծում անվտանգության համար՝ Նախագահի անվտանգության ծառայությունը այլ ելք չի ունեցել, քան անհապաղ միջամտելը»։
Դեսպանատունը հավելել է, որ անվտանգության միջոցառումները, համաձայն ստանդարտ գործառնական ընթացակարգերի, ուղղված են եղել բացառապես պահպանության և անվտանգության ապահովմանը։
«Մենք վճռականորեն մերժում ենք փաստերի խեղաթյուրման կամ անհիմն պնդումների տարածման փորձերը՝ կապված երկրի առաջնորդի և պահպանվող ավտոշարասյան դեմ ուղղված գործողություններին ի պատասխան ձեռնարկված միջոցների հետ։ Ադրբեջանի անվտանգության ծառայության աշխատակիցները միշտ գործում են հյուրընկալող կողմի հետ սերտ համակարգմամբ», — ասված է հայտարարության մեջ։
