Telegram-ի հիմնադիր Պավել Դուրովի գործողությունները կհետաքննվեն Ռուսաստանի քրեական օրենսգրքի 205.1 հոդվածի 1.1 մասի (ահաբեկչական գործունեությանը օժանդակություն) քրեական գործի շրջանակներում: Այս մասին ասվում է «Ռոսիյսկայա գազետա» և «Կոմսոմոլսկայա պրավդա» թերթերի փետրվարի 24-ի հրապարակումներում։

Ըստ հրապարակումների, որոնք հղում են անում ԱԴԾ նյութերին, «2022 թվականից ի վեր Ռուսաստանում մեսենջերի օգտագործմամբ գրանցվել է 153.000 հանցագործություն, որոնցից 33.000-ը՝ դիվերսիոն-ահաբեկչական և ծայրահեղական, այդ թվում՝ պայթյունների կազմակերպում, զինկոմիսարիատների հրկիզում և սպանություններ։

Telegram-ի միջոցով է համակարգվել  2024 թվականի մարտին «Կրոկուս Սիթի Հոլլի» ահաբեկչությունը։ Օգտագործելով մեսենջերի վերլուծությունները՝ չարամիտները տեղեկատվություն են հավաքել բարձրաստիճան զինվորական պաշտոնյաների, բլոգերների և լրագրողների տեղաշարժերի մասին, որոնք հետագայում դարձել են հանցագործությունների զոհ։ Կանխվել է Telegram-ի միջոցով նախապատրաստված ընդհանուր առմամբ 475 ահաբեկչական հարձակում»։