Ադրբեջանի արտաքին գործերի նախարար Ջեյհուն Բայրամովը հանդիպել է Թուրքիայի Ազգային մեծ ժողովի արտաքին հարաբերությունների հարցերով կոմիտեի նախագահ Ֆուատ Օկտայի և Վրաստանի խորհրդարանի արտաքին հարաբերությունների հարցերով կոմիտեի նախագահ Նիկոլոզ Շամխարաձեի գլխավորած պատվիրակությունների հետ, հաղորդում է Ադրբեջանի արտաքին գործերի նախարարությունը։

Հանդիպման ժամանակ քննարկվել են ադրբեջանա-թուրքական դաշնակցային հարաբերությունների ընթացիկ վիճակը և զարգացման հեռանկարները, Վրաստանի հետ Ադրբեջանի ռազմավարական գործընկերությունը և տարածաշրջանում անվտանգության հետ կապված ընդհանուր իրավիճակը։

Նրանք նաև մտքեր են փոխանակել հետկոնֆլիկտային շրջանում տարածաշրջանում խաղաղության և կայունության ամրապնդման, հարաբերությունների կարգավորման գործընթացի և այդ գործընթացում խորհրդարանական դիվանագիտության դերի վերաբերյալ։

Բայրամովը մանրամասն տեղեկատվություն է տրամադրել Ադրբեջանի ու Հայաստանի միջև խաղաղության և կարգավորման գործընթացի վերաբերյալ, ուշադրություն է հրավիրել ձեռնարկված քայլերի և Ադրբեջանի ակնկալիքների շուրջ։