«Ռուսական երկաթուղիներ» պետական ընկերությունը կրճատում է իր կենտրոնական ապարատի 15%-ը. հեռացման է ենթարկվում վեց հազար աշխատակից։

«Մենք կատարել ենք կառուցվածքի ու գործառույթների վերլուծություն և համապատասխանաբար կկրճատենք հաստիքային միավորների թիվը։ Սա հիմնականում վերաբերում է վարչա-կառավարչական անձնակազմին, այդ թվում՝ մեր մասնաճյուղերի ղեկավարությանը։ Մենք կկրճատենք մոտ 6000 մարդ։ Մենք դա անում ենք պարբերաբար՝ ավելի կամ պակաս»,- «Ինտերֆաքս»-ին տված հարցազրույցում ասել է «Ռուսական երկաթուղիներ» ընկերության գլխավոր տնօրեն Օլեգ Բելոզերովը։

Նրա խոսքով՝ «Ռուսական երկաթուղիներ»-ը նաև օպտիմալացնում է տեխնոլոգիաները, կրճատում ծախսերը, ինչպես նաև կրճատում է էլեկտրաէներգիայի և դիզելային վառելիքի ծախսերը։

Բելոզերովը նշել է, որ 2026 թվականին ընկերությունը նախատեսում է դրա հաշվին խնայել 74 միլիարդ ռուբլի։

Գլխավոր տնօրենի խոսքով՝ «Ռուսական երկաթուղիներ»-ի մաքուր պարտքը կազմում է 3,3 տրիլիոն ռուբլի։