ԱՄՆ-ն ակնկալում է Իրանի հետ հակամարտության կարգավորման շուրջ համաձայնության հասնել ոչ ուշ, քան մինչև ապրիլի 9-ը։ Այս մասին գրում է Ynet պորտալը՝ հղում անելով տեղեկացված աղբյուրին։
«Իսրայելական աղբյուրը հայտնել է, որ ամերիկացիները ապրիլի 9-ը նշանակել են որպես պատերազմի ավարտի օր։ Մինչ այդ դեռ կա 21 օր՝ պատերազմի և բանակցությունների համար», — ասված է հաղորդագրության մեջ։
Պարբերականի զրուցակցի խոսքով՝ հակամարտության կարգավորումը մինչև ապրիլի 9-ը հնարավորություն կտա ԱՄՆ նախագահ Դոնալդ Թրամփին ներկա գտնվել Իսրայելի Անկախության օրվա տոնակատարություններին (ապրիլի 21–22), որտեղ նրան պետք է հանձնվի «Իսրայելի մրցանակը»՝ այդ երկրի բարձրագույն պետական պարգևը։
Տեղեկատվության համաձայն՝ Վաշինգտոնի և Թեհրանի միջև բանակցությունները ծրագրված են այս շաբաթ և կանցկացվեն Պակիստանի տարածքում։
Ավելի վաղ Թրամփը Պենտագոնին հանձնարարել էր հինգ օրով հետաձգել ցանկացած ռազմական հարված իրանական էլեկտրակայանների և էներգետիկ ենթակառուցվածքների ուղղությամբ՝ ընթացիկ հանդիպումների և քննարկումների հաջող ավարտի պայմանով։
Հիշեցնենք, որ ԱՄՆ-ն և Իսրայելը փետրվարի 28-ին ռազմական գործողություն են սկսել Իրանի դեմ՝ ավիահարվածներ հասցնելով մի շարք քաղաքների։ Ի պատասխան՝ Իրանը հրթիռներ է արձակել Իսրայելի տարածքի ուղղությամբ, ինչպես նաև գրոհել է Պարսից ծոցի երկրներում գտնվող ամերիկյան ռազմաբազաները։ Ստեղծված իրավիճակի պատճառով տարածաշրջանի մի շարք պետություններ ժամանակավորապես փակել են օդային տարածքը։ Նույն օրը հարվածների հետևանքով սպանվել է Իրանի գերագույն առաջնորդ Ալի Խամենեին։
