Հունական Aegean Airlines ավիաընկերության Blue ամսագիրը ծավալուն
հոդված է հրապարակել Հայաստանի մասին՝ «Հայաստան. Թանգարան բաց երկնքի տակ» խորագրով։
Այս մասին հայտնում է Հունաստանում Հայաստանի դեսպանությունը:
Հրապարակման մեջ Հայաստանը ներկայացվում է որպես հարուստ մշակութային
ժառանգություն ունեցող և միաժամանակ ժամանակակից ստեղծարար ներուժով աչքի ընկնող երկիր։
Հատուկ անդրադարձ է կատարվում Երևանին,
որը, ըստ հոդվածի, համադրում է պատմական արժեքներն ու նորարարական զարգացումները՝ ձևավորելով
բազմաշերտ և գրավիչ միջավայր։
Նշվում է, որ քաղաքի մշակութային կյանքում առանցքային դեր ունեն
թանգարաններն ու արվեստի կենտրոնները։ Միևնույն ժամանակ, ընդգծվում է երիտասարդական
ստեղծարար նախաձեռնությունների կարևորությունը, այդ թվում՝ TUMO Studios-ը, որոնք նպաստում
են նոր սերնդի ներգրավմանը և հայկական մշակույթի արդիական վերաիմաստավորմանը։
Հոդվածում անդրադարձ կա նաև հայկական խոհանոցին, որը ներկայացվում
է ինչպես ավանդական, այնպես էլ ժամանակակից ձևաչափերով։ Նշվում է, որ Երևանում գործող ռեստորանները համադրում
են ազգային համերը նորարար մոտեցումների հետ՝ ապահովելով բարձրակարգ գաստրոնոմիկ փորձառություն։
Բացի այդ, Հայաստանը ներկայացվում է որպես զարգացող գինեգործական
ուղղություն՝ հիմնված բազմադարյա ավանդույթների և տեղական խաղողի տեսակների վերածննդի
վրա։
