«Կանայք և գլոբալ անվտանգային ճարտարապետությունը» մտակենտրոնի ավագ փորձագետ Էլեն Հոխիկյանի խոսքով՝ Եվրամիությունը նմանատիպ ռեժիմով չի աշխատել որևէ պետության հետ, որը չի հանդիսանում ԵՄ  ասոցացված անդամ կամ գոնե դիմում ներկայացրած պետություն: «Հայաստանի հետ նմանատիպ ռեժիմով աշխատանքն իսկապես դրական եմ գնահատում»,- Civic.am-ի տաղավարում ասաց նա։

Հոխիկյանի դիտարկմամբ՝ երբ Հայաստանը սառեցնում էր իր անդամակցությունը ՀԱՊԿ-ում, հաճախ էին ասում, թե մենք կկործանվենք, մեզ այլևս ոչ ոք զենք չի վաճառի: «Ասում էին՝ մեզ կուլ կտան, բայց ինչպես տեսաք՝ ճիշտ հակառակը տեղի ունեցավ։ Սառեցման հետևանքով մենք հասանելիություն ունեցանք մի շարք այլ շուկաների, զենք-զինատեսակների, որոնք մինչ այս ՀՀ-ն հնարավորություն չէր ունեցել ստանալու։ Սա մեզ հնարավորություն տվեց Ռուսաստանից կրիտիկական կախվածությունն իջեցնել 10-15 տոկոսի։ Ռուսաստանն այդ դասը չի սովորել և փաստացի իր իսկ կամքով նետում է Եվրամիության գիրկը՝ մոտավորապես առաջնորդվելով նույն կացնային մեթոդներով»,-նկատեց նա։

Մեր զրուցակցի խոսքով՝ այս ամենի արդյունքում Եվրամիությունը եկավ մեզ օգնության՝ մեր առջև բացելով 450 միլիոն բնակիչ ունեցող  եվրոպական շուկան: «Այն լծակները, որոնք Ռուսաստանի Դաշնությունն ուներ, հերթով իր իսկ ձեռքով վերացնում է ու մեզ ստիպում, որ մենք վերանայենք մեր հարաբերությունները Ռուսաստանի ու տարատեսակ ռուսական կառույցների հետ»,- եզրափակեց նա։

Հարցազրույցն ամբողջությամբ՝ տեսանյութում

Մարիամ Գրիգորյան