The Wall Street Journal-ի հաղորդմամբ⁠՝ ԱՄՆ-ի բանակցողները Nvidia-ի արհեստական բանականության չիպերի հասանելիության խոստումն օգտագործել են՝ օգնելու համար անցյալ տարի Հայաստանի և Ադրբեջանի միջև ձեռք բերված նախնական խաղաղության համաձայնության ապահովմանը։

Ըստ բանակցություններին ներգրավված անձանց՝ Հայաստանին համաձայնագրին մասնակցելու համար խթանելու նպատակով հայկական տվյալների կենտրոնի ծրագրի համար չիպերի գնումների թույլտվությունների ընդլայնումը նախկինում չէր հրապարակվել։

Հրապարակման համաձայն՝ սա ԱՄՆ պաշտոնյաների կողմից «չիպային դիվանագիտություն» կոչվող քաղաքականության ամենաուշագրավ օրինակներից մեկն է։

Ամերիկացի բանակցողները ենթադրել են, որ Հայաստանի համար ավելի հեշտ կլինի համաձայնել խաղաղության պայմանագրին, եթե երկիրը ստանա ԱՄՆ-ի հետ ավելի սերտ տնտեսական կապերի հնարավորություն։ Դրա շրջանակում առաջարկվել է թույլատրել Հայաստանում Nvidia-ի ավելի հզոր չիպերի վաճառքը։

WSJ-ի տեղեկություններով՝ խոսքը մասնավորապես Հրազդանում կառուցվող Firebird տվյալների կենտրոնի համար Nvidia-ի առաջադեմ չիպերի մատակարարման մասին է։ Նախագծի արժեքը, ըստ հրապարակման, կարող է գերազանցել 5 միլիարդ դոլարը, իսկ կենտրոնում նախատեսվում է տեղադրել Nvidia-ի շուրջ 70 հազար AI սերվեր։

ՀՀ-ում ԱՄՆ նախկին դեսպան Քրիստինա Քվինը նշել է, որ Nvidia-ի գործոնը «փազլի շատ կարևոր մասն էր»։ Նա նաև ասել է, որ ԱՄՆ-ը Հայաստանի և Ադրբեջանի հետ տնտեսական համագործակցության համաձայնագրերը դիտարկել է որպես խաղաղության բանակցություններին լրացուցիչ խթաններ։