ՌԴ-ի դեմ ԵՄ նոր պատժամիջոցների ցուցակում են հայտնվել Wildberries-ի հիմնադիրը, «Յանդեքս»-ի խոշորագույն բաժնետերը, Վալենտինա Մատվիենկոյի որդին

 


 

ԵՄ նոր պատժամիջոցների ցուցակում ընդգրկվել է Wildberries-ի հիմնադիր Տատյանա Կիմը, հայտարարել է Ֆրանսիայի արտաքին գործերի նախարար Ժան-Նոել Բարոն։

Նրա խոսքով՝ երկուշաբթի՝ նոյեմբերի 16-ին, ԵՄ երկրների արտաքին գործերի նախարարները համաձայնեցրել են պատժամիջոցների կիրառումը 145 ֆիզիկական և իրավաբանական անձանց նկատմամբ, որոնք կապված են Ռուսաստանի հետ։ Կիմից բացի, պատժամիջոցներ կկիրառվեն նաև Սանկտ Պետերբուրգի նավթային տերմինալի նկատմամբ, պարզաբանել է Բարոն։

Պատժամիջոցների նախագծում, որի հետ ավելի վաղ ծանոթացել էր «Ազատություն» ռադիոկայանը, նշվում է, որ Wildberries-ը գործում է «որպես Ռուսաստանի զինված ուժերի մատակարարման ցանց՝ նպաստելով ռազմական և կրկնակի նշանակության ապրանքների վաճառքին»։ Բացի դրանից, նշվել է, որ ընկերությունը ռազմավարական գործընկերություն է կնքել ՎՏԲ բանկի հետ, որի արժեթղթերի վերահսկիչ փաթեթը  պատկանում է պետությանը, և որը ԵՄ պատժամիջոցների տակ է։


EUobserver պարբերականը հայտնել է, որ պատժամիջոցների ցուցակում կընդգրկվեն գործարար Ռուսլան Բայսարովը (երգչուհի Քրիստինա Օրբակայտեի կրտսեր որդու հայրը և Ռամզան Կադիրովի ընկերը), վենչուրային ներդրող և «Յանդեքս»-ի խոշորագույն բաժնետեր Ալեքսանդր Չաչավան, ինչպես նաև Վալենտինա Մատվիենկոյի որդին՝ Սերգեյը (ում նկատմամբ արդեն պատժամիջոցներ են սահմանվել ԱՄՆ-ի, Կանադայի և Ճապոնիայի կողմից):


Wildberries-ի մամուլի ծառայությունը հայտարարել է, որ պատժամիջոցները չեն ազդի ընկերության աշխատանքի վրա, քանի որ այն ակտիվներ չունի Եվրամիությունում և չի աշխատում ԵՄ երկրներում։