Երևան քաղաքի առաջին ատյանի ընդհանուր իրավասության քրեական դատարանի դատավոր Կ. Ֆարխոյանը, 2024 թվականի փետրվարի 14-ին ստանալով քրեական վարույթն ըստ մեղադրանքի Լևոն Ռոբերտի Քոչարյանի՝ ՀՀ քրեական օրենսգրքի 452-րդ հոդվածի 3-րդ մասով և Սերգեյ Կարենի Ասատուրովի ՀՀ քրեական օրենսգրքի 452-րդ հոդվածի 3-րդ մասով, նշանակել է նախնական դատալսումներ 2024 թվականի փետրվարի 27-ին՝ ժամը 13:00-ին, Երևան քաղաքի առաջին ատյանի ընդհանուր իրավասության քրեական դատարանի «Կենտրոն» նստավայրում՝ դատական նիստերի թիվ 2 դահլիճում: Այս մասին civic.am-ը տեղեկացավ datalex.am-ից։ Որոշման պատճենն ուղարկվել է հանրային մեղադրողին, ինչպես նաև վարույթի մասնավոր մասնակիցներին՝ դրան կցելով հասցեատիրոջ իրավունքների և պարտականությունների վերաբերյալ հուշաթերթ:
Նշենք, որ Քոչարյանի և Ասատուրովի նկատմամբ որպես խափանման միջոց կիրառվել է բացակայելու արգելքը։ Ըստ հիշյալ կայքի՝ երկու ամբաստանյալներն էլ նախկինում դատված չեն եղել։
Հիշեցնենք, որ սույն գործը դատարան է մուտքագրվել փետրվարի 13-ին։
Թե Քոչարյանին, թե Ասատուրովին մեղադրանք է առաջադրվել այն բանի համար, որ նրանք պաշտոնատար անձ հանդիսացող ՀՀ ՆԳՆ ոստիկանության ԵՔՎ հատուկ նշանակության գումարտակի ծառայողների օրինական ծառայողական գործունեությանը միջամտելու նպատակով բռնություն են գործադրել նրանց նկատմամբ:
