«Սա յուրահատուկ դեժավյու է, հենց այս տոնով, այս բառամթերքով խոսում էին մեզ հետ, երբ նրանք իշխանություն էին։ Հասկացա, որ եթերով չեմ կարող ասել այն ամենը, ինչ ասում էին մեր հասցեին, և ինչ արվում էր մեր հասցեին։ Ի վերջո, սա Մարտի 1-ի, Հոկտեմբերի 27-ի բառամթերքն է, որովհետև բառամթերքը, բառապաշարը, այդ խոսքերի ընտրությունը լեզվամտածողություն է։ Իսկ եթե իրենց մտածողությունն այսպիսին է, եթե անհանդուրժողականությունը նրանց գլխավոր կարգախոսն է և հիմքը այդ ամբողջ կառույցի, ապա դա պարզապես ցույց է տալիս, թե ինչ է սպասվում մեզ, եթե նրանք գան իշխանության»,- Civic.am-ի հետ զրույցում խոսելով Բագրատ Գալստանյանի և «Հայաստան» խմբակցության որոշ պատգամավորների խոսույթի մասին՝ ասաց «Հայաստանի եվրոպական կուսակցության» նախագահ Տիգրան Խզմալյանը։

Նա նշեց, որ եթե նրանք վերադառնան իշխանության, ապա կվերադառնանք հենց այդ բռնի ուժի օրենքին, Մարտի 1-ին, կվերադառնանք Հոկտեմբերի 27-ին, կվերադառնանք տեռորի, «չեռնոռուսիայի» կարգավիճակին, որովհետև դա այն է, ինչ հիմա շատ ավելի մեծ մասշտաբներով կատարվում է Ռուսաստանում։

«Եթե նրանք ձգտում են վերադարձնել Հայաստանը ռուսական լծի տակ, պարզ է, որ դա վերադառնալու է հենց այդպես։ Եվ սա միայն խոսքեր չեն, այդ խոսքերի հետևում կան գործեր, որոնք մենք պետք է թույլ չտանք իրականացնել»,- ասաց Տիգրան Խզմալյանը։
 
Մանրամասները՝ տեսանյութում
Լիլիթ Թադևոսյան