Արմավիրի բոլոր բնակավայրերում 30 տարվա դադարից հետո հսկայածավալ աշխատանքներ են ընթանում

Արմավիրում լայն թափով ընթանում են շինարարական աշխատանքներ՝ ինչպես համայնքային, պետական, այնպես էլ սուբվենցիոն ծրագրերով։ 30 տարվա դադարից հետո Արմավիր համայնքի բոլոր բնակավայրերը շուտով մանկապարտեզներ կունենան։  


Այգեվան, Նորավան և Լենուղի գյուղերում՝ Քաղաքաշինության կոմիտեի պատվերով, ՀՀ պետական բյուջեի միջոցներով, կառուցվում են մոդուլային տիպի մանկապարտեզներ: Այգեվանի մանկապարտեզը շահագործման կհանձնվի այս տարի, իսկ Նորավանի և Լենուղու մանկապարտեզները՝ մինչև 2025 թվականի սկիզբ: Ծրագրերի արժեքները մոտ 700-800 մլն դրամ են։ Բացի շենքի կառուցումից՝ նախատեսվում է նաև ամբողջական կահավորում նոր, ժամանակակից գույքով, բակային հատվածի բարեկարգում, խաղահրապարակի կառուցում: Այս գյուղերը տասնամյակներ շարունակ չեն ունեցել մանկապարտեզներ, բայց շուտով երեխաները կունենան հնարավորություն՝ հաճախելու մանկապարտեզներ հենց իրենց բնակավայրերում։  


Բացի Այգեվանից՝ մանկապարտեզներ են կառուցվում նաև Խանջյան բնակավայրում։ Այստեղ սուբվենցիոն ծրագրով հիմնանորոգվում է գյուղի մանկապարտեզը, որն անկախությունից հետո երբևէ չի գործել։ Մանկապարտեզի շինարարության ավարտը, ըստ աշխղեկի, նախատեսված է 2025 թվականի փետրվարին։ Խանջյանում, բացի մանկապարտեզի կառուցումից, վերջին 2-3 տարիների ընթացքում նաև այգի է կառուցվել, որը, ինչպես նշեց քաղաքապետ Վարշամ Սարգսյանը, ամբողջապես փոխել է բնակավայրի միջավայրը։  Բացի Այգեվանից, Խանջյանից՝ մանկապարտեզ է կառուցվում նաև Արաքսում, որը ևս շահագործման կհանձնվի այս տարի։ Իսկ Լենուղի բնակավայրում, որտեղ նույնպես անկախությունից ի վեր մանկապարտեզ չի եղել, ևս 144 երեխայի համար մանկապարտեզ է կառուցվում։ Քաղաքապետի խոսքով՝ բուռն շինարարական աշխատանքները նաև աշխատատեղերի խնդիր են լուծում համայնքում։


Համայնքում նաև բազմաթիվ ճանապարհներ են հիմնանորոգվել։ Այս պահին Արմավիր քաղաքի Շահումյան փողոցն է հիմնանորոգվում։ Ծրագրի արժեքը 575 250 624 դրամ է, որի 65 տոկոսը տրամադրել է համայնքը, 35-ը՝ կառավարությունը։ Ծրագրով նախատեսված է իրականացնել 1730 գծմ երկարությամբ ճանապարհի երթևեկելի մասի ասֆալտապատում, մայթերի սալիկապատում, բազալտե եզրաքարերի փոխարինում, ջրատար առուների կառուցում, գծանշման և երթևեկության նշաններով կահավորման աշխատանքներ։ Այս պահին ընթանում են փողոցի երթևեկելի մասի ասֆալտի ներքին շերտի տեղադրման աշխատանքներ։


Մյասնիկյան գյուղում էլ շահագործման է հանձնվել բացօթյա ունիվերսալ մարզադաշտ՝ մինիֆուտբոլի, բասկետբոլի և վոլեյբոլի համար։ Ծրագիրն իրականացվել է Արմավիրի համայնքապետարանի և Հայաստանի տարածքային զարգացման հիմնադրամի համագործակցության արդյունքում։ Մարզադաշտերի կառուցումը, ինչպես նշեց Սարգսյանը, սպորտային ժամանց է ապահովելու համայնքի պատանիների և երիտասարդների շրջանում, ինչպես նաև նոր հետաքրքրություններ է առաջացնելու երեխաների շրջանում՝ հետագայում պրոֆեսիոնալ կերպով սպորտով զբաղվելու համար։