Վարչապետ Նիկոլ Փաշինյանը ԱԺ-ում հայտնեց, որ մշակվում է Հայաստանի անվտանգության ռազմավարությունը, որը, սակայն, հանրային չի ընթանում. նշեց, որ այդ աշխատանքը չերևացող է, սակայն ընթանում է։ Փաշինյանը ասաց նաև, որ պետք է իրողությունները հարմարեցվեն և արտացոլվեն փաստաթղթում, այլ ոչ գրվի մի բան, որը հետո գետնի վրա կհակասի իրողություններին։ ՄԱՀՀ-ի ղեկավար, քաղաքագետ Ստյոպա Սաֆարյանը կարծում է, որ հնարավոր չէ երկարաժամկետ կանխատեսումներ անել այսօրվա իրավիճակում։ «Նույնիսկ ամենալուրջ վերլուծաբանին եթե հրավիրենք, երաշխիք չկա, որ կանխատեսումները՝ անվտանգային միտումների մասին, ճիշտ կլինեն»,- ասաց Սաֆարյանը։  

Նրա կարծիքով՝ պետք է ստեղծել ներքին օգտագործման փաստաթուղթ, բայց խուսափելու համար մեծ տարընթերցումներից, հետագա շահարկումներից ճիշտ կլինի, որ այն հրապարակային չլինի։ Միաժամանակ այդ փաստաթղթի կազմումը պետք է հնարավորինս ներառական լինի։

Սաֆարյանը որպես օրինակ ասաց, որ 2023 թվականին շատ քչերն էին կարծում, որ Ռուսաստանը ԼՂ-ն կհանձնի ամբողջությամբ Ադրբեջանին ու դուրս կգա այնտեղից։

Իսկ երբ ելակետը սխալ է ընտրվում, հետագա ճանապարհը սխալ տեղ է տանում։

Սաֆարյանը նկատեց նաև, որ Կովկասում ճանապարհների վրա վերահսկողություն ունենալու, ներկայություն ունենալու մտադրություն Ռուսաստանը վաղուց է ունեցել, իսկ միջանցքի թեման ակտուալ է եղել դեռևս 90-ականներից։

«Միջանցքի թեման օրակարգում եղել է 90-ականներից, ուղղակի ՀՀ իշխանությունները երբեք ազնվորեն չեն ասել դրա մասին։ Պուտինը Բաքվում Ալիևին ասել է՝ եթե չստորագրես խաղաղության պայմանագիրը, ապա կստանաս «զանգեզուրյան միջանցքը»»,- ասաց քաղաքագետը։

Նրա կարծիքով՝ Ադրբեջանը չի ստորագրի խաղաղության պայմանագիրը, որովհետև այդպիսով փակվում են նրա հետագա բոլոր հնարավորությունները հարմար առիթի դեպքում հարձակվելու Հայաստանի վրա։

Մանրամասն՝ տեսանյութում

Վովա Հակոբյան