«Ունենք 13 համաձայնեցված կետ ու ևս երեքը, որ մասնակի են համաձայնեցվել։ Նախաբանը ևս համաձայնեցվել է, ու մենք ակնկալում ենք Ադրբեջանի դրական արձագանքին, բայց Ադրբեջանը դաշտ է նետում նորանոր նախապայմաններ»։ Այս մասին Civic.am-ի հետ զրույցում ասաց Ազգային ժողովի «Քաղաքացիական պայմանագիր» խմբակցության պատգամավոր Սոնա Ղազարյանը՝ անդրադառնալով Հայաստանի ու Ադրբեջանի միջև խաղաղության պայմանագրի հնարավոր կնքմանը։

Ըստ Ղազարյանի՝ Սահմանադրության նախապայմանը կեղծ օրակարգ է Ադրբեջանի կողմից. «Համաձայնեցված կետ կա, որ կողմերը չեն կարող հղում անել ներքին կանոնադրությանը, որպեսզի հրաժարվեն խաղաղության պայմանագրից»։

Պատգամավորի կարծիքով՝ Ադրբեջանը փորձում է այդ կերպ քողարկել իր Սահմանադրության մեջ առկա կետերը, որոնք կարող են խոչընդոտ հանդիսանալ խաղաղության պայմանագրին. «Քանի որ Ադրբեջանի Սահմանադրությունը հղում է  անում 1918 թվականի հռչակագրին, այնտեղ ՀՀ որոշ տարածքների նկատմամբ հավակնություններ կան»։

Պատգամավորը նշեց, որ Սյունիքի ճանապարհի հետ կապված նոյեմբերի 9-ի հայտարարության 9-րդ կետը շահարկվում է  ոչ միայն Ադրբեջանի ու ՌԴ-ի կողմից, այլև ՀՀ որոշ քաղաքական շրջանակների կողմից. «Փորձում են օտար նարատիվներ մտցնել ներքաղաքական օրակարգ։ Ապաշրջափակմանը ՀՀ-ն այսօր էլ պատրաստ է, և սպասում ենք Ադրբեջանի արձագանքին»։

Ինչ վերաբերում է ՀՀ-ի ու ԱՄՆ-ի հարաբերություններին, Ղազարյանը ասաց. «ՀՀ-ի երկխոսությունը ԱՄՆ-ի հետ վերածվում է  ռազմավարության. շարունակելու ենք այդ օրակարգը»։

Մանրամասն՝ տեսանյութում

Դավիթ Լևոնյան