ՀՀ վարչապետ Նիկոլ Փաշինյանը
երեկ և այսօր գրառումներ է կատարել։ Երեկվա գրառման մեջ վարչապետը մասնավորապես ասել
է․
«Համոզմունքս այն է, որ մեր ժողովուրդը
շատ վաղուց է կատարել իր ընտրությունը՝ հօգուտ իրական Հայաստանի: Բայց մենք՝ տարբեր
ժամանակներում կառավարողներս, նրան չենք լսել, այլ ըստ էության մեր ժողովրդին պարտադրել
ենք ապրել «պատմական ցիկլի» մեջ:
Հենց սրա համար է, որ պետք է
ներողություն խնդրենք մեր ժողովրդից ու ես խնդրում եմ իմ բաժին ներողությունը»:
Թեմայի վերաբերյալ Civic.am-ը
զրուցել է իրավագետ Արտաշես Խալաթյանի հետ։
«Ես հասկանում եմ, որ Հայաստանի
արտաքին քաղաքականության փիլիսոփայությունը փոխվում է Հայաստանի ինքնաբավության, այսինքն՝
ինքնաբավությունն ամենևին չի նշանակում, որ Հայաստանն ունենում է անիրականանալի կամ անհամաչափ մեծ հավակնություններ,
այլ պարզապես նշանակում է, որ Հայաստանը ելնում է այն աշխարհաքաղաքական և պատմաքաղաքական
իրողություններից, որոնք առկա են և դրա հիման վրա, ըստ էության, կառուցում է իր պետականությունը։
Դա նշանակում է, որ այլ պետությունների համար պլացդարմ լինելուց անցում է կատարվում
Հայաստանի՝ տարածաշրջանի գործոն լինելու տեսլականին։ Ինչը նշանակում է, որ անկախ իր
քաղաքական ներուժի չափից, մակարդակից, Հայաստանը փորձ է անելու ընդունել ինքնուրույն
քաղաքական որոշումներ և կատարել ինքնաբավ քաղաքական քայլեր, որոնք հնարավորինս թելադրված
չեն լինի որևէ աշխարհաքաղական կենտրոնի քմահաճույքներով»,- ասաց Արտաշես Խալաթյանը։
Նա նշեց, որ հայտնի է, որ Հայաստանը
տվյալ պարագայում Ռուսաստանի կողմից նաև օգտագործվել է որպես միջոց՝ Թուրքիայի հետ
հարաբերությունները կարգավորելու, այսինքն՝ այդ միջոցներից մեկն է ընկալվել, այդ թվում
նաև Հայաստանի և Թուրքիայի միջև հարաբերությունների կարգավորմանը Ռուսաստանի այս կամ
այն չափով խոչընդոտելը պայմանավորված է Հայաստանի ինքնուրույն գործոն դառնալը կանխելու
հանգամանքով։
Մանրամասները տեսանյութում
Լիլիթ Թադևոսյան
