«Բանդան ՀՀ-ում նոր «Հոկտեմբերի 27» էր նախապատրաստում. ձերբակալվածների թիվը կմեծանա»: Այս մասին Civic.am-ի հետ զրույցում ասաց  Ազգային ժողովի «Քաղաքացիական պայմանագիր» խմբակցության պատգամավոր Արմեն Խաչատրյանը՝  անդրադառնալով ԱԱԾ-ի բացահայտմանը, ըստ որի՝ Հայաստանի քաղաքացիներ ու ԼՂ-ի նախկին բնակիչներ զինված հեղաշրջման նախապատրաստական աշխատանքների մեջ են ընդգրկվել ՌԴ-ում, որից հետո պետք է վերադառնային Հայաստան ու փորձեին հեղաշրջում իրականացնել:   

Ըստ Խաչատրյանի՝ ՀՀ քաղաքացիներին ուղարկել են Դոնի Ռոստով, որպեսզի իբր վարժական հմտություններ ձեռք բերեն և վերադառնան՝ ՀՀ-ում զինված ծառայություն իրականացնեն, բայց իրական նպատակը եղել է ահաբեկչություն իրականացնելը. «Նրանք այնտեղ պատրաստվում էին որպես մասնագիտացված ահաբեկիչ ՀՀ-ի դեմ գործելու համար։ Որոշները հրաժարվել են մասնակցել այդ վարժական միջոցառումներին, իսկ մյուս մասը շարունակել է, և կարևորը այն է, որ արդեն ձերբակալվածներ կան»։

Խաչատրյանը կարծում է, որ նախապատրաստական աշխատանքներին ավելի շատ մարդիկ են մասնակցել. «Կարծում եմ, որ 7 հոգով չէր սահմանափակվում, կարծում եմ՝ տասնյակ անձինք ենք ընդգրկված եղել բանդայի մեջ, որոնք պետք է ոստիկանության զորքերի դեմ գործեին և պետական իշխանության դեմ իրենց գործողությունները պետք է ավարտին հասցնեին։ Հանցափորձը կարելի է համարել չավարտված, որովհետև ուժային կառույցները շատ լավ են աշխատել»։

Պատգամավորը նշեց, որ նման դեպքերին պետք է լուրջ վերաբերվել, իսկ այն անձինք, որոնք ներգրավված են նման գործողությունների մեջ, պետք է ամենախիստ պատասխանատվության ենթարկվեն. «Դա բարոյական առումով հայրենիքի դավաճանություն է»։

Մանրամասն՝ տեսանյութում

Դավիթ Լևոնյան