Հոկտեմբերի 26-ին Վրաստանում
տեղի ունեցած խորհրդարանական ընտրությունների և հետընտրական զարգացումների վերաբերյալ
Civic.am-ը զրուցել է Անվտանգային քաղաքականության հետազոտական կենտրոնի փորձագետ,
քաղաքագետ Ռոբերտ Ղևոնդյանի հետ։
«Անմիջապես ընտրությունների գործընթացը
սկսելուց հետո կանխատեսելի էր, որ նման հայտարարություն է լինելու ԿԸՀ-ի կողմից։ Դա
խորը վերլուծական գիտելիքներ ունենալու արդյունք չէ, դա արդյունք է սեփական փորձի,
քանի որ նման գործընթացներ մենք երկար տարիներ ունեցել ենք ՀՀ-ում, մինչև 2018 թվականը։
Այն, ինչ տեղի էր ունենում Վրաստանի ընտրական տեղամասերում, ակնհայտորեն նման էր նրան,
ինչ տեղի էր ունենում Հայաստանի ընտրական տեղամասերում: Եվ այն, ինչ տեղի ունեցավ դրանից
հետո, ամբողջապես կրկնեց այն, ինչ այդ ժամանակ լինում էր Հայաստանում։ Եվ արդյունքում
սպասելի էր, որ Վրաստանի ԿԸՀ-ն հայտարարելու է 50-ից ավելի տոկոսի մասին, ինչը նշանակում
էր մեծամասնություն, և սպասելի էր նաև, որ ընդդիմությունը համաձայն չի լինելու այդ
արդյունքների հետ»,- ասաց քաղաքագետը։
Հայտնելով նաև իր կարծիքը այն մասին, որ ՀՀ վարչապետ
Նիկոլ Փաշինյանը շնորհավորել է Վրաստանի վարչապետին ընտրություններում հաղթանակ տանելու
կապակցությամբ, Ռոբերտ Ղևոնդյանը դա նորմալ համարեց։
«Հայաստանը ստիպված է աշխատել
Վրաստանի ցանկացած իշխանության հետ, անկախ նրանից՝ Վրաստանի այդ իշխանությունն ինչ
արտաքին կողմնորոշում կունենա, ինչպիսին կլինի ներքին քաղաքականությունը, ինչպիսի ռեժիմ
կգործի Վրաստանում, Հայաստանը չունի այլընտրանք։ Հայաստան-Վրաստան փոխհարաբերությունները
մշտապես պետք է հիմնված լինեն երկու պետությունների շահերի համադրման վրա։ Եվ Հայաստանի
վարչապետը՝ անկախ նրանից, թե ով կընտրվեր, պետք է շնորհավորեր. պետք էր սպասել ԿԸՀ-ի
կողմից պաշտոնական տվյալների հրապարակմանը, ինչը տեղի ունեցավ, և դրանից հետո շնորհավորել,
այլ ոչ թե շտապել, ինչպես, օրինակ, Հունգարիայի վարչապետ Օրբանը։ Անհրաժեշտ է նշել,
որ սա Հայաստանի ցանկացած իշխանության ռացիոնալ գործողությունն է»,- հավելեց Ռոբերտ
Ղևոնդյանը։
Մանրամասն՝ տեսանյութում
Լիլիթ Թադևոսյան
