Երևան քաղաքի առաջին ատյանի ընդհանուր իրավասության քաղաքացիական դատարանը՝ նախագահությամբ դատավոր Էդ. Ամալյանի, մասնակի բավարարել է ԱԺ «Քաղաքացիական պայմանագիր» խմբակցության անդամ Հրաչյա Հակոբյանի հայցապահանջն ընդդեմ «Զորակցություն Հայրենյաց Պաշտպանին» հասարակական կազմակերպության հիմնադիր-նախագահ Անի Կարապետյանի։

Վերջինս, հիշեցնենք,  2021 թվականի դեկտեմբերին իր ֆեյսբուքյան էջում գրառում էր արել՝ արատավորելով  Հրաչյա Հակոբյանի պատիվն ու արժանապատվությունը: 

Ա. Կարապետյանը (#խուլիգանների-իշխանություն հեշթեգով) Հակոբյանի հասցեին վիրավորական արտահայտություններ գրելուց բացի՝ նաև սպառնացել էր՝   «այսօրվանից զգույշ քայլիր Երևանի փողոցներում. ինձ հետ առաջիկա հանդիպումից հետո չեղածդ ինքնասիրության մասին երազելու ես»,  «ԱԺ-ում Գերասիմ Վարդանյանի քեզ ու ձեր խուլիգանական խմբակին հնչեցրած բոլոր որակավորումների տակ ստորագրում եմ և դեռ մի բան էլ ավելին»։

Անի Կարապետյանը, ըստ դատարանի վճռի, պարտավոր է   հրապարակայնորեն ներողություն խնդրել և դրամական փոխհատուցում վճարել 500.000 (Հակոբյանը պահանջել էր 2 մլն 500 հազար) ՀՀ դրամ՝ որպես վիրավորանքի համար հասցված ոչ նյութական վնասի հատուցման գումար:

Անի Կարապետյանից հօգուտ Հրաչյա Հակոբյանի, ըստ դատարանի վճռի, պետք է բռնագանձել 35.000 ՀՀ դրամ՝ որպես վերջինիս կողմից նախապես կատարված դատական ծախս, պետական տուրքի գումար, ինչպես նաև 100.000 ՀՀ դրամ՝ որպես դատական ծախս, փաստաբանի խելամիտ վարձատրության գումար:

Վճիռը կամովին չկատարելու դեպքում կկատարվի Հայաստանի Հանրապետության դատական ակտերի հարկադիր կատարման ծառայության միջոցով:

Վճիռն օրինական ուժի մեջ է մտնում հրապարակման պահից մեկ ամիս հետո և նույն ժամկետում կարող է բողոքարկվել ՀՀ վերաքննիչ քաղաքացիական դատարանում:
 
Նշենք, որ Անի Կարապետյանը հայտնի է որպես ՀՀ նախկին  նախագահ Ռոբերտ Քոչարյանի աջակից  և  աչքի է ընկնում ՀՀ իշխանության հասցեին վիրավորանք, ատելության խոսք պարունակող հանրային հայտարարություններով։