Արցախի պաշտպանության նախկին նախարար Ջալալ Հարությունյանին առնչվող քրեական վարույթը կասեցվել է։ Այս մասին Civic.am-ին ասաց ՔԿ մամուլի քարտուղար Գոռ Աբրահամյանը։ 

«Նախաքննության օբյեկտիվությունը՝ համակողմանիությունը, ապահովելու նպատակով նշանակվել է հանձնաժողովային ռազմագիտական փորձաքննություն, և հիմք ընդունելով այդ հանգամանքը՝ վարույթ իրականացնող քննիչը միջնորդություն է ներկայացրել դատախազին, որպեսզի Ջալալ Հարությունյանի նկատմամբ հարուցված քրեական հետապնդումը կասեցվի մինչև փորձաքննության արդյունքների ստանալը։ Այսինքն՝ փորձաքննության արդյունքներն ստանալուց հետո արդեն գործի ելքի հետ կապված դատավարական որոշումներ կարող են կայացվել»,- հավելեց ՔԿ մամուլի քարտուղարն ու ընդգծեց, որ Ջալալ Հարությունյանը շարունակում է մնալ մեղադրյալի կարգավիճակում։   

Հիշեցնենք, որ Ջալալ Հարությունյանը մեղադրվում է 44-օրյա պատերազմի ժամանակ ծառայողական պարտականությունների նկատմամբ անփույթ վերաբերմունք դրսևորելու համար, որոնք առաջացրել են ծանր հետևանքներ։ 

Մեղադրանքում ներկայացված դրվագներից մեկը վերաբերում է 2020 թվականի հոկտեմբերի 7-ին հայկական կողմի ձեռնարկած հակահարվածին, այն դեպքում, երբ հայկական կողմը 1։5 հարաբերակցությամբ թե՛ քանակապես, թե՛ որակապես զիջել է հակառակորդին։

Նախաքննական մարմնի փոխանցմամբ՝ Հարությունյանի այս գործողություններն անզգուշությամբ առաջացրել են ծանր հետևանքներ՝ ձախողվել է բանակային հակահարվածը։ Ավելի ուշ Հարությունյանը ձևավորել է նոր զրահախումբ և նրանց առջև դրել նույն մարտական խնդիրը, այն դեպքում, որ այս նոր զրախումբը էապես զիջել է հոկտեմբերի 7-ին հակահարձակման օպերացիայում ընդգրկված ուժերն ու միջոցները։ Հոկտեմբերի 8 -ի այդ մարտական առաջադրանքը ևս ձախողվել է՝ առաջացնելով ծանր հետևանքներ։ 

Մեղադրանքում ներկայացված երկրորդ դրվագն էլ վերաբերում է Ֆիզուլիի շրջանի Ջուվառլու կոչվող բնակավայրի մոտակայքում հոկտեմբերի 12-ի իրադարձություններին։ Ըստ ՔԿ-ի՝ այնտեղ նկատվել է 100-ից ավելի զինծառայողներից բաղկացած խմբի տեղաշարժ կրակային դիրքի ուղղությամբ, որոնց մեջ նկատվել են նաև Հայաստանի ԶՈՒ համազգեստ կրող անձինք: Կասկածելով, որ մոտեցողները հակառակորդի դիվերսիոն խումբ են, ռադիոկապով զեկուցել են այդ մասին։ Ջալալ Հարությունյանը, ըստ մեղադրանքի, առանց համակողմանի ուսումնասիրության նշել է, որ տվյալ խմբավորումը յուրային է, և սխալ տեղեկություն փոխանցելու հետևանքնով զոհվել են մարտկոցի անձնակազմի 20 զինծառայողներ, վիրավորվել՝ 7 -ը, մինչև հիմա անհայտ է փոխգնդապետի գտնվելու վայրը։  Ջուվառլու կոչվող բնակավայրի մոտակայքում N զորամասը անցել է հակառակորդի հսկողության տակ՝ այնտեղ պահվող ծառայողական գաղտնիք պարունակող փաստաթղթերով։