Երևանի նախկին քաղաքապետ Հայկ Մարությանի երբեմնի թիմակից, Երևանի «Ազգային առաջընթաց»
խմբակցության ավագանու անդամ, իր ոչ ստանդարտ վարքագծով աչքի ընկնող Պեդրո Զարոկյանի
դեմ «Ֆակտորի Փրոդաքշն» ՍՊԸ-ն քաղաքացիական հայց է ներկայացրել, որը Երևանի քաղաքացիական
դատարան է մուտքագրվել ս․թ․ հունվարի
23-ին։ Այս մասին civic.am-ը տեղեկացավ «Դատալեքս» հարթակից։
Հայցվորը պահանջում է դատարանից «պարտավորեցնել պատասխանող Պեդրո Հադանի Զարոկյանին հրապարակայնորեն
հերքել պատասխանողի Ֆեյսբուք սոցիալական կայքի անձնական էջում 23․12․2024 թվականին
հրապարակված հրապարակման և պատասխանողի ինստագրամ սոցիալական կայքի անձնական էջում
16.12.2024 թվականին հրապարակված տեսանյութի զրպարտություն համարվող փաստացի տվյալները։
Նշենք, որ հարցի հիմք հանդիսացած հիշյալ հրապարակման մեջ Զարոկյանը գրել է․ ««Factory Production»
ՍՊԸ-ն, որը 2018-ից իվեր ստացել է 3,279,535,075 դրամ կամ 8,5 միլիոն դոլարի
պետական պայմանագրեր գրեթե ամբողջությամբ՝ առանց մրցույթի ուղղակի գնումներով,
սերտորեն կապված է Տիգրան Ավինյանի մտերիմ ընկերոջ և Կենտրոնի թաղապետ Պետրոս
Պետոյանի հետ։ Մինչ թաղապետ դառնալը նա իր մարքեթինգային բիզնեսը որպես
հավատարմագրային կառավարման հանձնեց «Factory Production»-ին, որը ապագայում կարող
է լեգիտիմացնել պետական տենդերների միլիարդավոր դրամների փոխանցումները։ Ուրիշ
ինչո՞ւ հարյուր հազարավոր հնարավորություններից նա ընտրեց մի ընկերություն, որը
ներգրավված է գերուռճացված գներով տենդերներ շահելու կոռուպցիոն սխեմաներում: Ահա
թե ինչ է իրենից ներկայացնում համակարգային կոռուպցիան»։
Նշենք, որ հայցվորը
նաև պատասխանողից պահանջում է հօգուտ «Ֆակտորի
Փրոդաքշն» սահմանափակ պատասխանատվությամբ ընկերության բռնագանձել 1 000 000 (մեկ միլիոն)
ՀՀ դրամ՝ որպես պատասխանողի ֆեյսբուք սոցիալական կայքի անձնական էջում 23.12.2024թվականին
կատարված հրապարակմամբ և ինստագրամ սոցիալական կայքի անձնական էջում հրապարակված տեսանյութով
զրպարտության համար նախատեսված փոխհատուցում:
