«Դա սկանդալային հայտարարություն
է, ու եթե ՌԴ-ում մի քիչ լավ կարդան Քոչարյանի հայտարարությունը, ապա պետք է հասկանան,
որ մի հատ չափալախ պետք է լինի այդ ուղղությամբ, որովհետև Քոչարյանը, չգիտակցելով,
Պուտինին մեղադրել է ԼՂ-ն հանձնելու մեջ»: Այս մասին ասաց քաղաքագետ Ստյոպա Սաֆարյանը՝ անդրադառնալով
Ռոբերտ Քոչարյանի մամուլի ասուլիսին և նշելով, որ 10 տարի ՀՀ նախագահի պաշտոնում աշխատած
մարդը բառ առ բառ, տող առ տող կրկնում է ՌԴ-ի բոլոր հայտարարությունները, թե իբր մենք
դավաճանել ենք ՌԴ-ին ու դրա համար պատժվել ենք։
Սաֆարյանը նշեց, որ ՌԴ-ի ողորմությամբ
Քոչարյանին դարձրին գուբերնատոր ՀՀ-ում, բայց Քոչարյանը միշտ սխալ է պլանավորել ՀՀ-ի
ապագան. «Հիմա Քոչարյանը ՌԴ-ին իր ծառայությունն է առաջարկում, իր վրա խաղադրույք է
բերում»։
Ինչ վերաբերում է Մեղրին ԼՂ-ով
փոխանակելու Քոչարյանի ու Հեյդար Ալիևի բանակցություններին, Սաֆարյանը նշեց. «Քոչարյանը
քուչի շուստրիություն է արել։ Ադրբեջանը ծուղակ էր հյուսել ՀՀ-ի համար, ու Թուրքիան
էր հուշել Ադրբեջանին, թե ինչ անել։ Քոչարյանը իր բանակցություններով ընդունել է, որ ԼՂ-ն Ադրբեջանինն է։ Իրեն թվացել
է, թե ինքը շուստրի է, բայց Թուրքիան ու Ադրբեջանը հասել են նրան, որ Քոչարյանը ընդունի,
որ ԼՂ-ն Ադրբեջանինն է, ու ՀՀ-ի տարածքը դարձրել է բանակցային առարկա։ Միջազգային բանակցություններում
նույնիսկ չստորագրված փաստաթղթերը ու պայմանավորվածությունները իրենց հետքն են թողնում»։
Սաֆարյանը նշեց, որ Քոչարյանը
փորձում է կեղծել պատմությունը. «Եթե Հոկտեմբերի 27-ը չլիներ, ապա Քոչարյանը Ստամբուլում ստիպված
էր լինելու ստորագրել Մեղրիի տարբերակով խաղաղության պայմանագիրը, ու Հոկտեմբերի
27-ը դարձել է միջոց, որ Քոչարյանը չստորագրի Մեղրիի տարբերակը»:
Սաֆարյանի խոսքով՝ Քոչարյանը հասկացել
էր, որ Ստամբուլից ՀՀ չէր կարող վերադառնալ այդ պայմանագիրը ստորագրած, որովհետև եթե
վերադառնար, ապա ստիպված պետք է այդ խաղաղության պայմանագիրը անցկացներ Ազգային ժողովում,
բայց այնտեղ Կարեն Դեմիրճյանն ու Վազգեն Սարգսյանը չէին համաձայնելու, որովհետև իրենք
արդեն դեմ էին քվեարկել հոկտեմբերի 23-ի Անվտանգության խորհրդի նիստում. «Հոկտեմբերի 27-ից 4 օր առաջ ԱԽ նիստում Վազգեն Սարգսյանը Քոչարյանին
ասել է, որ ինքը ու Դեմիրճյանը դեմ են լինելու Մեղրիի տարբերակին»։
Մանրամասն՝ տեսանյութում
Դավիթ Լևոնյան
