Քաղաքագետ Դավիթ Ստեփանյանի հետ զրուցել ենք ՌԴ ԱԳ նախարար Սերգեյ Լավրովի այցի մասին։

Հարցին, թե արդյոք այս այցը տեղավորվո՞ւմ է վարչապետ Նիկոլ Փաշինյանի այն հայտարարության շրջանակում, որ Հայաստանը վարում է բալանսավորված արտաքին քաղաքականություն, քաղաքագետն ասաց. «Միանշանակ տեղավորվում է, և վարչապետ Փաշինյանը փաստորեն ուղիղ, բացահայտ նշել է այն քաղաքականությունը, որն այս պահին Հայաստանը տանում է։ Այս պահին իրոք Հայաստանը վարում է բալանսավորված քաղաքականություն, այլ հարց է՝ որքանով է այդ քաղաքականությունն էֆեկտիվ, որքանով է այդ քաղաքականությունը համապատասխանում ինքնիշխանության շահերին, բայց այն, որ քաղաքականությունը բալանսավորված է, միանշանակ ճիշտ գնահատական է: Եվ վարչապետի այցը մայիսի 9-ին Մոսկվա, և Լավրովի այցը Հայաստան այդ քաղաքականության միայն մեկ ուղղության դրսևորումներն են»։

 Նա նշեց, որ իրեն մտահոգում է այն, որ դեպի ԵՄ գնալու քայլեր և առաջընթաց չկա։ Քաղաքագետի խոսքով՝ մենք Կիպրոսից լսեցինք, որ իրենք պատրաստ են մեզ այդ հարցում օգնել։

«Ես քայլերը չեմ տեսնում, և Արարատ Միրզոյանն ասում է, որ մենք օրենքն ընդունել ենք և վերջ։ Լավրովի հետ ասուլիսում, փաստացի արդարանալով, նշեց, չէ՞, որ մենք ԵՄ մասին օրենքն ընդունել ենք և ուրիշ բան չենք անում։ Հայտ չենք տալիս և ուրիշ որևէ քայլ չենք անում։ Դա այն է, ինչ ես խոսում եմ վերջին երկու տարվա ընթացքում։ Ես ասում էի, որ օրենքն ընդունվելու է և վերջ, էս ա»,- նշեց քաղաքագետը։

Ասուլիսի ժամանակ Լավրովը հայտարարեց, որ չի տեսնում ՀՀ-ի ուկրաինացման պատճառ՝ «Հայաստանը մեր դաշնակիցն է»։ Հարցին, թե Ռուսաստանը վստահելի գործընկե՞ր է, Դավիթ Ստեփանյանն ասաց՝ իհարկե ոչ։

«Եթե Ռուսաստանը հնարավորություն ունենար, մենք դա անվանում ենք Իլհամ Ալիևին վերցնել և տալ մեր գլխին, վաղուց տվել էր մեր գլխին, այնպես, ինչպես տվել էր 20-ին, 21-ին և 22-ին։ Այս պահին ուղղակի նրանք այդ հնարավորությունը չունեն, դրա համար այս պահին մի քիչ հանդարտվել է իրավիճակը մեր տարածաշրջանում, և այո, ուկրաինացման վտանգ չկա. իսկ ինչու պիտի լինի, եթե Հայաստանը վարում է բալանսավորված քաղաքականություն»,- հավելեց քաղաքագետը։

Մանրամասն՝ տեսանյութում

Լիլիթ Թադևոսյան