«Խաղաղության երկխոսություն» ՀԿ  նախագահ, իրավապաշտպան Էդգար Խաչատրյանի կարծիքով՝ կարևոր է պահպանել սահմանադրական դրույթները, և եկեղեցին ու պետությունը չխառնվեն միմյանց գործերին: «Մյուս կողմից՝ մենք հասկանում ենք, որ արդեն բավականին երկար տարիներ եկեղեցին փորձեր է անում խառնվելու քաղաքական գործընթացներին։ Բարձրաստիճան հոգևորականների կողմից հայտարարություններ են հնչում իշխանությունների դեմ. կարգն առաջին հերթին խախտել է եկեղեցին, դա պետք է ընդունենք որպես փաստ»,- Civic.am-ի հետ զրույցում ասաց  նա։

Խաչատրյանի խոսքով՝ եկեղեցին գործում է պետության տարածքում և չի կարող դեմ գնալ ՀՀ օրենսդրությանը. «Ուստի ես կարծում եմ, որ եկեղեցու նկատմամբ որոշակի պետական վերահսկողություն պետք է լինի, բերվի հարկային դաշտ, ուսումնասիրվի աղբյուրների թափանցիկությունը։ Չեմ ուզում մտնել բարոյականության, եկեղեցու ներքին կանոնների մեջ։ Ըստ իս՝ այն խնդիրները, որ բարձրաձայնվում են վերջին օրերին, պետք է ազդանշան լինեն  եկեղեցականներին, որ փորձեն ինքնակարգավորվել։ Սա պետք է լինի իրենց պարտավորությունը Հայ առաքելական եկեղեցու հետևորդների նկատմամբ»։

Իրավապաշտպանը  մտավախություն ունի, որ եկեղեցին պատմականորեն որոշակի ազդեցության է ենթարկվել Ռուսաստանի անվտանգային ծառայությունների կողմից. «Շատ հաճախ եկեղեցու և Ռուսաստանի տարբեր շրջանակներից հնչող հայտարարությունները իրար զուգահեռ են արվում։ Սա ես համարում եմ շատ լուրջ վտանգ, և  այն ակտուալ է դառնալու 2026 թվականի ընտրությունների շեմին։ Պետության անելիքը պետք է լինի փորձել բացահայտել կապը եկեղեցականների և Ռուսաստանի անվտանգային ծառայությունների՝ ՖՍԲ-ի և նախկին ԿԳԲ-ի միջև։ Սա իրավական գործընթաց է ենթադրում։ Ինձ չեն հետաքրքրում եկեղեցականների սեռական հարաբերությունները, էական է պետական անվտանգությունը, մեր պետության վրա Ռուսաստանի ազդեցության չեզոքացումը»։

Վերը թվարկածի   մեխանիզմը, Խաչատրյանի դիտարկմամբ, ոչ թե սոցիալական ցանցերով իրար վիրավորելն է,  այլ վարույթներ սկսելը։

Հարցազրույցն ամբողջությամբ՝ տեսանյութում

Մարիամ Գրիգորյան