«Հանուն հանրապետության» կուսակցության արտաքին գործերի քարտուղար Առնոլդ Բլեյանի
հետ զրուցել ենք Մերձավոր Արևելքում տիրող իրավիճակի և ներհայաստանյան զարգացումների
մասին։
Այսօր առավոտյան ԱՄՆ նախագահ
Դոնալդ Թրամփը հայտարարել է, որ Իսրայելը և Իրանը համաձայնության են եկել «12-օրյա
պատերազմի» ավարտի շուրջ։
Այս առնչությամբ մեր զրուցակիցը
հույս հայտնեց, որ դա երկար կպահպանվի, և ցանկացավ շնորհավորել իսրայելցիներին ու իրանցիներին,
որ իրենք կարողացան գալ խաղաղության: Նրա խոսքով՝ շատ կարևոր է, որ մեր տարածաշրջանում լինի
խաղաղություն, շատ կարևոր է, որ Իրանը համագործակցող երկիր լինի Արևմուտքի հետ, և մեզ
համար շատ կարևոր է, որ հնարավորության դեպքում ի վերջո ստորագրեն այդ միջուկային նոր
գործարքը՝ ԱՄՆ միջնորդությամբ, և Իրանի շուկան, տնտեսությունը բացվի տարածաշրջանի,
աշխարհի համար։
Խոսելով նաև որոշ հոգևորականների
և ռուսաստանցի օլիգարխ Սամվել Կարապետյանի ակտիվության մասին՝ Առնոլդ Բլեյանն ասաց.
«Հետքերը գնում են դեպի հյուսիս, դեպի Ռուսաստան: Ես այստեղ ամենակարևոր շեշտադրումը
պետք է անեմ, որ ՀԷՑ-ը ազգայնացվելու է, վերադարձվելու է ժողովրդին: Մենք գիտենք, որ
դրանից առաջ եղան «Էլեկտրիկ Երևանի» դեպքերը, և այդ պրոցեսների արդյունքում տեղափոխություն
եղավ Բիբինից դեպի Սամվել Կարապետյան, բայց այն հանգամանքը, որ նա կրում է հայկական
անուն-ազգանուն, չի նշանակում, որ այն պատկանում է հայերին, որովհետև Սամվել Կարապետյանն
ամբողջությամբ ռուսական պրոյեկտ է, ոտքից գլուխ։ Որքան Մարգարիտա Սիմոնյանն է հայ,
նույնքան հայ է Սամվել Կարապետյանը։ Սա պետք է հստակեցնենք և չխաբվենք ու չմտածենք,
որ սա բիզնեսի հանդեպ հարձակում է, հակառակը՝ դրանով մենք ցույց ենք տալիս, որ ՀՀ բիզնեսը
պետք է գործի ՀՀ օրենսդրությամբ և հանուն Հայաստանի Հանրապետության քաղաքացիների շահերի»։
Իսկ ինչ վերաբերում է Կտրիճ Ներսիսյանին,
մեր զրուցակիցն ասաց, որ մի կողմ դնենք, ենթադրենք, այն փաստարկը, որ իշխանությունն է պահանջում, ՀՀ ցանկացած քաղաքացի,
հավատավոր ունի այդ հարցադրումն անելու իրավունքը, ընդ որում՝ հոգևորականներն իրենց
հերթին ունեն այդ իրավունքը՝ հարցադրում անելու իրենց գերագույն հրամանատարին՝ կաթողիկոսին,
ի վերջո՝ նա խախտե՞լ է կուսակրոնության ուխտը, թե՞ ոչ։
Մանրամասն՝ տեսանյութում
Լիլիթ Թադևոսյան
