«Խաղաղության երկխոսություն» ՀԿ նախագահ, իրավապաշտպան  Էդգար Խաչատրյանի կարծիքով՝ ռուսական հեռուստաալիքների հեռարձակումը Հայաստանում պետք է դադարեցվեր շատ ավելի վաղ: «Բազմիցս եղել են ջղաձգված հայտարարություններ, բայց մեր իշխանությունները անտեսել են կամ փորձել ավելի դիվանագիտական մոտեցում ցուցաբերել, իսկ   վերջին իրադարձությունները դանակը  հասցրել են ոսկորին»,- Civic.am-ի հետ զրույցում ասաց նա։

Խաչատրյանի դիտարկմամբ՝ միայն  ռուսական հեռուստաալիքների հեռարձակման դադարեցումը բավարար չէ, որովհետև ՌԴ-ն ֆինանսավորում է բազմաթիվ տեղական լրատվամիջոցներ, նաև՝ առանձին դերակատարների: «Անընդհատ խոսում ենք Ռուսաստանից եկող հիբրիդային սպառնալիքների մասին, նաև այն մասին,  որ 2026 թվականի ընտրությունների նախաշեմին ՌԴ-ն ավելի ակտիվ է լինելու... ինձ մտահոգում է, որ հենց ընտրությունների նախաշեմին ենք սա անում, որովհետև հասկանում ենք, թե ինչ մեծ ճնշում է Ռուսաստանից գալիս, իսկ այն, որ ՀՀ քաղաքացիները պետք է պաշտպանված լինեին ռուսական կեղծ նարատիվներից ու գարշահոտ ստերից, որ ՀՀ քաղաքացիների ու իշխանությունների հասցեին լսում էինք՝ չի արվել։ Փաստորեն տարիներ շարունակ այդ ամենն անտեսվել է»,- նկատեց նա։

Իրավապաշտպանի  խոսքով՝ անհրաժեշտ է ռազմավարական մոտեցում, թե մենք ինչպես ենք դիմակայելու Ռուսաստանից եկող հիբրիդային սպառնալիքներին: «Ես անձնապես կտրուկ քայլերի կողմնակից եմ, փորձը ցույց է տալիս, որ դրանք ավելի էֆեկտիվ են եղել։ Օրինակ՝ Մոլդովան, Ռումինիան փակել են բոլոր ռուսական ալիքները, մշակութային օջախները, որոնք ընտրությունների ժամանակ օգտագործվում են ընտրակաշառք բաժանելու, անհնազանդության ցույցեր կազմակերպելու համար։ Այս բոլոր մեխանիզմներից պետք է զրկենք»,- ասաց Խաչատրյանը։

Հարցազրույցն ամբողջությամբ՝ տեսանյութում

Մարիամ Գրիգորյան