ԱՄՆ-ն աջակցում է Հարավային Կովկասում խաղաղության և կայունության առաջմղման ջանքերին։ Այս մասին ճեպազրույցի ժամանակ հայտարարել է ԱՄՆ Պետդեպարտամենտի պաշտոնական ներկայացուցիչ Անդրեա Բրյուսը՝ պատասխանելով լրագրողի հարցին։

Հարցը վերաբերում էր պետքարտուղար Մարկո Ռուբիոյի հայտարարությանը, որն արել էր հուլիսի 3-ին Նախարարների կաբինետի նիստում։ Այդ ժամանակ Ռուբիոն հույս էր հայտնել, որ շուտով Հայաստանի և Ադրբեջանի միջև խաղաղության համաձայնագիր կստորագրվի։ Լրագրողը հետաքրքրվել է, թե արդյոք այդ հայտարարությունը կապվա՞ծ է Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի միջև Աբու Դաբիում կայացած հանդիպման հետ։

«Մենք աջակցում ենք տարածաշրջանում խաղաղություն և կայունություն ապահովելու ջանքերին։ Մենք հետևում ենք համապատասխան հրապարակումներին, բայց այս պահին լրացուցիչ տեղեկությունների չենք տիրապետում»,- նշել է Բրյուսը։

Նա ընդգծել է, որ Թրամփի վարչակազմի դիրքորոշումը մնում է անփոփոխ։

«Սա վարչակազմ է, որն աշխատում է հանուն խաղաղության։ Նրանք կանեն ամեն անհրաժեշտը և կգնան այնտեղ, որտեղ կպահանջվի»,- ասել է նա՝ հավելելով, որ խաղաղության ձգտումը «ԱՄՆ արտաքին քաղաքականության առաքելության մասն է»։

Միևնույն ժամանակ, Պետդեպարտամենտի ներկայացուցիչը չի մանրամասնել, թե արդյոք Վաշինգտոնն այժմ ունի՞ որևէ կոնկրետ առաջարկ՝ աջակցելու Երևանի և Բաքվի միջև բանակցային գործընթացին։