«Խաղաղության երկխոսություն» ՀԿ նախագահ, իրավապաշտպան Էդգար Խաչատրյանի կարծիքով՝ ցանկացած գործընթաց, որը ՌԴ-ի ընկալմամբ հակասում է իր իմպերիալիստիկ շահերին, միտված է իր  աշխարհաքաղաքական դիրքի զիջմանը և իրենց համար անընդունելի է: «Եթե խոսք է գնում Հայաստանի կամ նախկին ԽՍՀՄ պետությունների անկախ գործելակերպի մասին, միանգամից Ռուսաստանի կողմից դժգոհության է արժանանում։ Ռուսաստանն ամեն ինչ անում է, որ մնա տարածաշրջանում ակտիվ դերակատար»,- Civic.am-ի հետ զրույցում ասաց նա։

Խաչատրյանի դիտարկմամբ՝ ՌԴ-ն հասկանում է, որ այժմ ակտիվ դերակատար մնալու ունակություն ու ռեսուրս չունի: «Օբյեկտիվորեն հայ-ադրբեջանական հակամարտության կարգավորումը նշանակում է, որ ՌԴ-ն դուրս է մնում։ Ցանկացած կայսրություն փորձում է փոքր երկրներին պահել իր ազդեցության տիրույթում»,- նկատեց նա։

Իրավապաշտպանը կարծում է, որ այսօր ընդդիմության պլան մաքսիմումն իշխանությունը վերցնելն է՝ թալանածը պահելու համար: «Բայց ժողովուրդը հիմար չէ, ես չեմ ուզում թերագնահատել մեր ազգի մտավոր կարողությունները»,- ասաց նա և հավելեց, որ միևնույն ժամանակ կարող է լինել պլան մինիմում՝  նորից զբաղեցնել երկրորդ տեղը և պահպանել քաոտիկ միջավայր։

Էդգար Խաչատրյանի դիտարկմամբ՝ ՌԴ-ի կողմից հիբրիդային պատերազմը շարունակվում է, տեղի ազդեցության գործակալներն էլ իրենց գործողություններով ակտիվորեն օգնում են. «Այն մոդելը, որ ՌԴ-ն աշխատեցրել է Վրաստանում, Մոլդովայում, կփորձի աշխատեցնել նաև Հայաստանում՝ լինի դա Սամվել Կարապետյանը, թե հետո մեկ այլ ուժ ի հայտ կգա՝ հայտնի չէ։ Իհարկե այդ մոդելն իրագործելու են, որովհետև այն բավականին էֆեկտիվ է ու լավ դրսևորեց իրեն Վրաստանի պարագայում՝ Իվանիշվիլիի հետ կապված։ Մենք պետք է սահմանափակենք ռուսական հնարավորությունները ներսում։ Անընդհատ խոսում ենք, բայց որևէ բան չի փոխվում, դա զայրացնում է»։

Նրա խոսքով՝ եթե հիբրիդային հարձակումներից չպաշտպանվենք, մեծ է հավանականությունը, որ ՌԴ-ն կհասնի հաջողության։

Հարցազրույցն ամբողջությամբ՝ տեսանյութում

Մարիամ Գրիգորյան