Քաղաքական վերլուծաբան Բորիս
Նավասարդանի կարծիքով՝ Վաշինգտոնում ձեռք բերված պայմանավորվածությունները՝ հատկապես
ճանապարհների ապաշրջափակման հետ կապված, Հայաստանի
առջև հնարավորություններ են բացում։
Civic.am-ի հետ զրույցում Նավասարդյանն
ասաց, որ ընդդիմադիր քաղաքական ուժերը քարոզչությունը տանում են «միջանցք» բառի շուրջ,
այն դեպքում, երբ այդ բառը տարբեր նշանակություններ կարող է ունենալ, ենթադրել տարբեր
կարգավորումներ ու ռեժիմներ. «Պարտադիր չէ, որ այդ «միջանցքը» հակասի ինքնիշխանության պահպանմանը։
Անհրաժեշտ է հետևողական աշխատանք համապատասխան
մասնագիտացված խմբերի կողմից, որոնք պետք է մշակեն կոնկրետ մանրամասներ, թե ինչպես
է աշխատելու այդ հաղորդակցման ուղին։ Այստեղ շատ բան կախված է լինելու այդ գործընթացում
մասնակցող անձանց կոմպետենտությունից և նաև
մեր կարողություններից՝ արագ իրականացնել այն, ինչի մասին կան հողի վրա պայմանավորվածություններ»։
Մեր զրուցակիցը նշում է՝ քննադատողները կարող էին առաջարկություններ
ներկայացնել, թե ինչպես դա կարելի է լավագույն
ձևով անել, և այդ դեպքում իրենց մտահոգությունները վերացնող գաղափարներն ու լուծումները
կարող են հիմք հանդիսանալ այդ բանակցութունների համար. «Իսկ ընդհանուր ասել՝ վերջ,
ինքնիշխանությունը զոհաբերում ենք, ադրբեջանա-թուրքական շահերն ենք իրացնում ընդդեմ
Հայաստանի, ավելի շատ քարոզչական բնույթի են և փորձելու են հանրությանը համոզել, որ
Հայաստանի իշխանությունները հետ են կանգնում իրենց խոստումներից ու պարտականություններից»։
Ըստ Նավասարդյանի՝ դա քաղաքական տեսանկյունից արդյունավետ լինել
չի կարող, որովհետև նախընտրական մրցակցությունը ենթադրում է պրակտիկ լուծումների պայքար.
«Մինչև դա չհասկանան, ընդդիմադիրները պարտված են մնալու։ Իսկ իշխանությունների համար
հիմնական ռիսկը կապված է նրա հետ, որ ծրագրերի
իրականացման ուղղությամբ պետք է լինեն կոնկրետ արդյունքներ»։
Քաղաքական վերլուծաբանը կարծում է, որ առայժմ հռետորաբանության տեսակետից ոչինչ չի փոխվում,
և դա խոսում է քաղաքական դաշտում առկա ճգնաժամի մասին: «Լուրջ փոփոխություն է եղել՝
անկախ նրանից, թե մենք ինչպես ենք վերաբերվում օգոստոսի 8-ի պայմանավորվածություններին՝
ընդհանուր համատեքստում, այդ համատեքստին պետք է համապատասխանեն խորհրդարանում տեղ
զբաղեցնելու ցանկություն ունեցող քաղաքական ուժերը։ Առանց դրա մենք կունենանք լճացում
ու ճգնաժամի խորացում»,- եզրափակեց նա։
Մարիամ Գրիգորյան
Հարցազրույցն ամբողջությամբ՝ տեսանյութում
