ՀՀ վարչապետի աշխատակազմի ղեկավար Արայիկ Հարությունյանը քաղաքացիական հայց է ներկայացրել ընդդեմ  «Օրագիր Մեդիա» ՍՊԸ»-ի։ Այս մասին civic.am-ը տեղեկացավ «Դատալեքս»  հարթակից։   

Հայցվորը պահանջում է  հրապարակայնորեն ներողություն խնդրել հետևյալ կերպ՝ «Տեղադրել հայտարարություն «Օրագիր» ֆեյսբուքյան էջում և oragir.news կայքում բոլորի համար հասանելի և տեսանելի եղանակով առնվազն 30 օր ժամկետով և հայտարարության վերնագիրը շարադրել այսպես՝ «Օրագիր Մեդիա» ՍՊԸ-ն ներողություն է խնդրում պարոն Արայիկ Հարությունյանից», իսկ բովանդակությունը շարադրել այսպես՝ «18.07.2025թ.-ին «Օրագիր Մեդիա» ՍՊԸ-ն իրեն պատկանող «Օրագիր» ֆեյսբուքյան էջում և oragir.news լրատվական կայքում տարածել է հրապարակում։ Հայտնում ենք, որ այդ հրապարակումը իր մեջ պարունակում է վիրավորական արտահայտություն Արայիկ Հարությունյանի հասցեին, ինչի համար ներողություն ենք խնդրում պարոն Հարությունյանից»։

Արայիկ Հարությունյանը նաև պատասխանողից հօգուտ իրեն՝ հայցվորի, պահանջում է բռնագանձել 3.000.000 (երեք միլիոն) ՀՀ դրամ՝ որպես վիրավորանքի համար նախատեսված փոխհատուցում: