Ինչպես արդեն տեղեկացրել ենք, այս տարվա «Ֆեստիվառ» երաժշտական, մշակութային միջոցառման առաջին կանգառը ՀՀ Արարատի մարզի Արտաշատ համայնքում էր։ Ուշագրավ է, որ միջոցառումն անցկացվում էր օգոստոսի 23-ին, այն օրը, երբ 35 տարի առաջ ընդունվեց Անկախության հռչակագիրը: Ուշագրավ էր նաև այն, որ միջոցառումն անցկացվում էր Արտաշատի Օգոստոսի 23 փողոցում։
Միջոցառման և մի քանի այլ հարցերի մասին զրուցել ենք Արտաշատ համայնքի ղեկավար Կառլեն Մկրտչյանի հետ։
«Միջոցառման անցկացումը Անկախության հռչակագրի 35-ամյակի հետ է կապված, և որոշում է կայացվել, որ Ֆեստիվառի առաջին կանգառը լինի հենց Արտաշատ համայնքում, ինչի համար մենք շատ ուրախ ենք և մեծ սիրով ու ուրախությամբ կազմակերպել ենք այս հիանալի փառատոնը։ Սա շատ լավ առիթ է համախմբելու մեր մարզի բնակիչներին, ինչպես նաև մեր ազգաբնակչությանը»,- ասաց Կառլեն Մկրտչյանը։
Քանի որ միջոցառման շրջանակներում կազմակերպվել էր նաև մարզում գործող ձեռնարկությունների արտադրանքի ցուցահանդես-վաճառք, համայնքի ղեկավարն ասաց, որ այս միջոցառումը շատ մեծ խթան է լինելու իրենց բիզնեսի զարգացման համար։
«Ունենք ներկայացված 37 տաղավար, 42 տնտեսվարողներ, որոնց մեծ մասն առաջին անգամ է ներկայացված, նրանք նոր են շուկայում, քիչ հայտնի։ Եվ սա ևս մեկ առիթ է իրենց տեղի արտադրանքով մեր հանրությանը ներկայանալու։ Ակնկալելի էր այս մասնակցությունը»,- նշեց համայնքապետը։
Պատասխանելով նաև հարցին, թե ինչպես համայնքի բնակիչներն ընդունեցին վաշինգտոնյան համաձայնագիրը, համայնքապետն ասաց, որ միանշանակ՝ դրական, և ոչ միայն մեր համայնքի բնակիչներն են դրական ընդունել, այլև մեր ազգաբնակչությունն է օգոստոսի 8-ի հռչակագիրը դրական ընդունել։
«Ես հույս ունեմ և համոզված եմ, որ ականատես կլինենք խաղաղության պայմանագրի կնքմանը։ Եվ միջոցառման մասնակցության ակտիվությունը հենց այդ հռչակագրի պատասխանն է»,- հավելեց համայնքապետը։
Մանրամասն՝ տեսանյութում
Լիլիթ Թադևոսյան
