Ադրբեջանի
նախագահ Իլհամ Ալիևը հարցազրույց է տվել Սաուդյան Արաբիայի «Ալ-Արաբիա» հեռուստաալիքին
և, անդրադառնալով Հայաստանի հետ խաղաղության գործընթացին, նշել, թե ինքն է «նախաձեռնել
բանակցությունների ձևաչափը և ներկայացրել խաղաղության համաձայնագրի նախագիծը»:
Նա ընդգծել է, որ Հայաստանի
հետ բանակցությունները տևել են մի քանի տարի և ավարտվել Վաշինգտոնում՝ ԱՄՆ նախագահ
Թրամփի և նրա թիմի ակտիվ աջակցությամբ: «Ես համարում եմ, որ սա իսկապես հակամարտության
ավարտն է, պատերազմի ավարտը: Պաշտոնապես խաղաղության պայմանագիրը չի ստորագրվել մեկ
կոնկրետ պատճառով. Հայաստանի Սահմանադրության մեջ դեռ պահպանվում է մի դրույթ, որը
կասկածի տակ է դնում Ադրբեջանի տարածքային ամբողջականությունը»,- ասել է Ադրբեջանի
նախագահը:
Թեմայի վերաբերյալ զրուցել ենք
«Անվտանգային քաղաքականության հետազոտական կենտրոնի» փորձագետ, քաղաքագետ Ռոբերտ Ղևոնդյանի
հետ։
«Նախ նշենք, որ Հայաստանը բազմիցս
պատասխանել է այդ մեղադրանքին, բայց եթե իրական քաղաքական ռեժիմում դիտարկենք, ըստ
ամենայնի, Ալիևը դեռևս սպասումներ ունի, և սպասումները Հայաստանից
չեն, այդ սպասումներն այլ երկրներից են։ Գուցե ԱՄՆ-ից այն, ինչ որ արդեն ստացավ Ալիևը,
զարգացում պետք է ունենա՝ ըստ Բաքվի ընդհանուր կարծիքի։ Օրինակ՝ 907-րդ բանաձևը մեկ
տարով Թրամփը կասեցրեց, բայց Բաքուն կցանկանար, որպեսզի այն ընդհանրապես հանվեր օրակարգից,
սակայն այս պահի դրությամբ, ինչքանով ես եմ տեղյակ, այդ առումով նախաձեռնություն Կոնգրեսում
չկա, որովհետև Կոնգրեսի իրավասության սահմաններում է 907-րդ բանաձևն ընդհանրապես չեղարկելը։
Հնարավոր է՝ Ալիևը սպասում է նման որոշակի գործողությունների, որից հետո նոր կգա և
արդեն կստորագրի այդ համաձայնագիրը»,- ասաց քաղաքագետը։
Խոսելով նաև այն մասին, որ ըստ
մամուլում տպագրված արտահոսած զեկույցի՝ 44-օրյա պատերազմում Ադրբեջանը բելառուսական
զենքով հայկական 11 ԱԹՍ է խոցել, քաղաքագետն ասաց, որ դա իր համար նորություն չէր.
Բելառուսը «Պոլոնեզ» համակարգեր էր վաճառել Ադրբեջանին, և դրանք պատերազմի ժամանակ
աշխատել են։
«Ես՝ ինքս, որպես պատերազմի մասնակից,
տեղում տեսել եմ, որ բելառուսական ռազմական տեխնիկան աշխատում է հայկական ուժերի դեմ,
և կարծում եմ, որ եթե ես նման տեղեկատվության տիրապետում եմ, Հայաստանի իշխանությունները
ևս այդ տեղեկատվությանը տիրապետել են, այնպես որ այնպես չէ, որ այս պահին տեղեկացան
ՀԱՊԿ-ի շրջանակներում Բելառուսի դավաճանական գործողությունների մասին։ Այս առումով
շատ ճիշտ կլիներ, որ Հայաստանը վաղուց գրողի ծոցն ուղարկած լիներ ՀԱՊԿ-ը, առավել ևս,
իմ գնահատմամբ, լավագույն ժամանակաշրջանը դրա համար 2024 թվականի ապրիլի 5-ին նախորդող
ժամանակաշրջանն էր, երբ Բրյուսեում կազմակերպվում էր հայտնի հանդիպումը»,- նշեց քաղաքագետը։
Մանրամասն՝ տեսանյութում
Լիլիթ Թադևոսյան
