ՌԴ նախագահի աշխատակազմի ղեկավարի տեղակալ Դմիտրի Կոզակը սեփական ցանկությամբ հրաժարականի դիմում է ներկայացրել: Այս մասին հայտնում է РБК -ն՝ հղում անելով երկու աղբյուրների։

Պարբերականի տեղեկություններով՝ Կոզակը դիտարկում է «բիզնեսով զբաղվելու տարբեր առաջարկներ»։

Կոզակի հրաժարականի մասին հայտնել են նաև լրագրող Ալեքսեյ Վենեդիկտովը և քաղաքագետ Արկադի Դուբնովը՝ հղում անելով աղբյուրներին։

Կոզակը Ռուսաստանի նախագահ Վլադիմիր Պուտինի ամենավաղեմի համախոհներից մեկն է։ Նրանք միասին աշխատել են Սանկտ Պետերբուրգի քաղաքապետարանում 1990-ականներին։

Օգոստոսի սկզբին The New York Times-ը, հղում անելով աղբյուրներին, հաղորդել է, որ դեռևս 2022 թվականին Կոզակը խորհուրդ է տվել Պուտինին չներխուժել Ուկրաինա, իսկ 2025 թվականին առաջարկել է Ռուսաստանի նախագահին սկսել խաղաղության բանակցություններ և իրականացնել ներքին բարեփոխումներ Ռուսաստանում, այդ թվում՝ կառավարությանը ենթարկել ուժային կառույցները։