Իրանի նախագահ Մասուդ Փեզեշքիանը
առանձին շնորհավորական ուղերձներ է հղել Հայաստանի նախագահին և վարչապետին՝
Անկախության օրվա կապակցությամբ։
Իրանական լրատվամիջոցների
փոխանցմամբ՝ ՀՀ նախագահ Վահագն
Խաչատուրյանին ուղղված շնորհավորական ուղերձում Փեզեշքիանը ընդգծել է, որ Իրանի և
Հայաստանի երկու ժողովուրդները, ունենալով հնագույն ու խորը պատմություն,
քաղաքակրթություն և մշակույթ, վաղուց ապրում են կողք կողքի և ունեն ամուր կապեր ու
շահեր։ Նա հույս է հայտնել, որ երկու երկրների ղեկավարների կամքի շնորհիվ նրանց
միջև հարաբերությունների խորացման և զարգացման գործընթացը կշարունակվի
ռազմավարական տեսլականի և շահերի հիման վրա՝ հիմնված ընդհանուր նպատակների վրա։
ՀՀ վարչապետ Նիկոլ Փաշինյանին ուղղված շնորհավորական ուղերձում Իրանի նախագահը նաև
նշել է, որ վերջին տարիներին Իրանի և Հայաստանի միջև հարաբերությունները ցուցաբերել են դինամիկա քաղաքական, տնտեսական ու
մշակութային ոլորտներում, և հայտարարել է. «Հուսով եմ, որ երկու երկրների առաջնորդների
կամքի և համագործակցության զարգացման համար առկա հարուստ հնարավորությունների
օգտագործման շնորհիվ այս գործընթացը կշարունակվի՝ հանուն ռազմավարական նպատակներին
հասնելու և տարածաշրջանում խաղաղության ու կայունության ամրապնդման»։
