Իրանի նախագահ Մասուդ Փեզեշքիանը շնորհավորանքներ է հղել Հայաստանի նախագահին, վարչապետին և ժողովրդին Անկախության օրվա կապակցությամբ։ Շնորհավորանքի մասին հայտնել են Իրանի Իսլամական Հանրապետության նախագահի մամուլի ծառայությունից։
Նախագահ Վահագն Խաչատուրյանին և վարչապետ Նիկոլ Փաշինյանին ուղղված առանձին ուղերձներում Փեզեշքիանն ընդգծել է իրանցի և հայ ժողովուրդների միջև խոր պատմական, մշակութային և քաղաքակրթական կապերը։
Խաչատուրյանին ուղղված իր ուղերձում Փեզեշքիանը հույս է հայտնել, որ երկու երկրների ղեկավարության ներքո երկկողմ հարաբերությունների խորացման և ամրապնդման գործընթացը կշարունակվի՝ հիմնվելով ընդհանուր շահերի և ռազմավարական նպատակների վրա։
Փաշինյանին ուղղված իր ուղերձում Իրանի նախագահը նշել է վերջին տարիներին Իրան-Հայաստան հարաբերությունների դինամիկ զարգացումը տարբեր քաղաքական, տնտեսական և մշակութային ոլորտներում։
Իրանի նախագահը լավատեսություն է հայտնել, որ երկու երկրների պաշտոնյաների նվիրվածության և համագործակցության բազմաթիվ հնարավորությունների շնորհիվ այս դրական միտումը կշարունակվի՝ նպաստելով տարածաշրջանում խաղաղությանն ու կայունությանը։
