«Անցյալ ամիս Վաշինգտոնում Ադրբեջանի
և Հայաստանի միջև խաղաղության պայմանագրի նախաստորագրումից հետո մենք մտնում ենք նոր
պատմական դարաշրջան Հարավկովկասյան տարածաշրջանում, ինչի կապակցությամբ նպատակահարմար
համարեցինք ավստրիացի գործընկերներին և բարեկամներին տեղեկացնել ստեղծված իրավիճակի
մասին»։ Այս մասին Austria Press Agency գործակալությանը տված հարցազրույցում հայտարարել
է Ադրբեջանի նախագահի՝ հատուկ հանձնարարությունների գծով հատուկ ներկայացուցիչ Էլչին
Ամիրբեկովը։
Նա նշել է Հայաստանի գործող
Սահմանադրությունից բխող խնդիրը։ Նրա խոսքով՝ մասնավորապես, Սահմանադրության
նախաբանում կան տարածքային պահանջներ Ղարաբաղի վերաբերյալ։ «Ստորագրվելիք
խաղաղության պայմանագիրը ենթադրում է տարածքային պահանջներից փոխադարձ
հրաժարում»,- նշել է Էլչին Ամիրբեկովը։
Վերջինս ընդգծել է, որ
տարածաշրջանում գոյություն ունեն երկարատև խաղաղության և կայունության հսկայական հնարավորություններ։
Էլչին Ամիրբեկովը այդ ուղղությամբ
կարևոր քայլ է համարել 43- կիլոմետրանոց ավտոճանապարհի և երկաթուղու կառուցումը,
որն անցնում է Հայաստանի տարածքով և Ադրբեջանի արևմուտքը կապում Նախիջևանի հետ։
«Խոսքը ոչ միայն Ադրբեջանի երկու մասերի վերամիավորման, այլև Հայաստանի և
Ադրբեջանի, ինչպես նաև Ասիայի և Եվրոպայի միացման մասին է»,- ասել է նա՝ մեկնաբանելով
նախագիծը, որը Վաշինգտոնում անվանել են «Խաղաղության և բարգավաճման երթուղի»։
«Սա խաղաղության նախագիծ է, որից,
քաղաքական կամքի առկայության դեպքում, կարող են շահել տարածաշրջանում բոլորը»,- ասել
է նա՝ մեկնաբանելով Իրանի կողմից քննադատությունը։
