Մամուլում
գրվեց, թե Վաղարշապատում տեղի ունենալիք ՏԻՄ ընտրությունների ժամանակ Արցախի պաշտպանության
բանակի նախկին հրամանատար, «Միասնական Հայրենիք»
կուսակցության առաջնորդ Սամվել Բաբայանը որոշել է համագործակցել ԱԱԾ նախկին
տնօրեն Արթուր Վանեցյանի հետ՝ սատարելով նրա ղեկավարած «Հայրենիք» կուսակցության կողմից
առաջադրվելիք քաղաքապետի թեկնածու Խաչիկ Մանուկյանին։ Նկատենք, որ երեկ «Հայրենիք» կուսակցության
մամուլի խոսնակը, արձագանքելով Բաբայանի՝ համագործակցության մասին հայտարարությանը,
մասնավորապես նշել է, որ դա իրենց համար անակնկալ էր, և այդպիսի քննարկում տեղի չի
ունեցել։ «Մենք հայտարարել ենք, որ ընտրություններին մասնակցելու ենք առանձին։ Մինչ այս պահը որևէ փոփոխություն այդ առումով տեղի չի ունեցել»,-
մասնավորապես հայտարարել էր խոսնակը։
Civic.am-ը
փորձեց պարզաբանումներ ստանալ Սամվել Բաբայանից՝
գրավոր հարցեր հղելով վերջինիս։
- Сivilnet.am-ի
հետ զրույցում հայտարարել եք, որ Վաղարշապատում տեղի ունենալիք ՏԻՄ ընտրություններին
ընդառաջ քաղաքական համագործակցություն եք սկսում «Հայրենիք» կուսակցության առաջնորդ Արթուր Վանեցյանի
հետ և մտադիր եք համատեղ աջակցել «Հայրենիք» կուսակցության առաջադրած թեկնածուին` բանաստեղծ-հրապարակախոս
Խաչիկ Մանուկյանին։ Արդյոք սա Ձեր միանձնյա՞ որոշումն է, թե՞ այս որոշմանը նախորդել
են կոնսուլտացիաներ, քննարկումներ Արթուր Վանեցյանի հետ։
- Բնականաբար,
նախորդել են քննարկումներ, սակայն դրանք վերաբերել են բացառապես Վաղարշապատի ՏԻՄ ընտրություններին,
ոչ թե դաշինք կազմելուն, ինչպես գրում է մամուլը։
Այլ թեմաներ, ինչպես նշել եմ նաև իմ հարցազրույցում, մենք չենք քննարկել։ Այս փուլում
իմ նպատակն է աջակցել և օժանդակել «Հայրենիք» կուսակցության կողմից առաջադրված թեկնածուին։
Ինչ վերաբերում է հետագա հնարավոր համագործակցությանը, ապա այն կախված կլինի Վաղարշապատի
ՏԻՄ ընտրությունների արդյունքներից։
- Խնդրում եմ ասել՝ Ձեր և Արթուր Վանեցյանի միջև
նախքան այս եղե՞լ է որևէ ֆորմատով գործակցություն։ Մասնավորապես 44-օրյա պատերազմի
օրերին և պատերազմից հետո հարաբերություններ
եք ունեցե՞լ եք Արթուր Վանեցյանի հետ, ի՞նչ բնույթի են եղել այդ հարաբերությունները։
- Պատերազմի օրերին
հանդիպումներ, քննարկումներ տեղի են ունեցել ՀՀ ԱԱԾ տնօրեն Արթուր Վանեցյանի հետ՝ ի
պաշտոնե (նշենք, որ պատերազմի օրերին ՀՀ ԱԱԾ պետը Արգիշտի Քյարամյանն էր, որին հետո
տնօրենի պաշտոնակատարի կարգավիճակում հաջորդեց
Միքայել Համբարձումյանը-խմբ.)։ Այսինքն՝ այդ հանդիպումներն ուղղակիորեն կապված են եղել իմ
և իր պաշտոնական գործունեության հետ։
- Հայտարարել եք նաև, որ «քաղաքական դաշտում միակ երիտասարդ անձը,
որին այսօր ես տեսնում եմ, Վանեցյան Արթուրն է, և պատրաստ եմ իրեն օգնել, որ կայանա
որպես քաղաքական գործիչ»։ Ստացվում է՝ ակնարկում եք, որ Արթուր Վանեցյանը չկայացած
քաղաքական գործիչ է և Ձեր աջակցության կարի՞քն ունի։ Նկատենք, որ ամիսներ առաջ քաղաքականություն մտնելու և նոր քաղաքական կուսակցություն ձևավորելու իր պլանի
մասին է հայտարարել «Մեր ձևով» շարժման համակարգող Նարեկ Կարապետյանը։ Չե՞ք կարծում,
որ նա, որպես երիտասարդ գործիչ, ավելի շատ
ունի Ձեր աջակցության կարիքը՝ կայանալու առումով։ Հնարավո՞ր է, որ գալիք ԱԺ ընտրություններին
ընդառաջ նաև համագործակցեք Կարապետյան ընտանիքի կողմից ձևավորվելիք կուսակցության և
քաղաքական թիմի հետ։
- Նախ՝
«երիտասարդ» բառը կոնտեքստից կտրված է շրջանառվել մամուլում, և հիմա նույնը, նույնիսկ՝
մի բան էլ ավելին անում եք Դուք՝ ելնելով Ձեր քաղաքական նախասիրություններից։ Դա, ըստ
իս, առնվազն անպատասխանատու է հանրության նկատմամբ։ Վերադառնալով հարցին՝ ես ասել եմ,
որ Վանեցյանին համարում եմ քաղաքական դաշտի այսօրվա գործող երիտասարդ խաղացողներից
մեկը և փորձում եմ օգտակար լինել։ Հարցի երկրորդ մասով կցանկանայի նշել, որ ես Կարապետյանների
հետ շփում չունեմ և երբևէ չեմ ունեցել, իսկ Վանեցյանի հետ պարբերաբար շփման մեջ եմ
եղել։
-
Պարոն Բաբայան, «Հրապարակ»-ը գրել է, որ դուք վերջին
շրջանում հանդիպել եք տարբեր քաղաքական ուժերի ներկայացուցիչների հետ և Ձեր
համագործակցությունն եք առաջարկել՝ «խոստանալով արցախցիների ներուժն իրենց օգտին
մոբիլիզացնել»: Անգամ իշխանական ինչ-որ օղակների հետ եք քննարկումներ ծավալել,
սակայն բոլորը զգուշորեն են նման առաջարկներին մոտեցել, քանի որ կասկածել են, թե
«Բաբայանը արցախցիներին մոբիլիզացնելու հնարավորություններ ունի։ Իսկ
Վանեցյան-Բաբայան համագործակցությունը ոմանց մոտ հատկապես տարակուսանք է
առաջացրել, քանի որ Բաբայանը ժամանակին մեղադրում էր Վանեցյանի խնամուն՝ Արցախի ՆԳ
նախկին նախարար Կարեն Սարգսյանին, Արցախի ռազմաքաղաքական ղեկավարությանն
Ադրբեջանին հանձնելու հարցում»: Արդյոք նման քննարկումներ ունեցե՞լ եք քաղաքական ուժերի հետ և
արցախցիներին մոբիլիզացնելու խոստում տվել։ Եվ բացի սրանից՝ ինչպե՞ս եք
պատկերացնում գործակցությունը Վանեցյանի
հետ, որի խնամին, ինչպես ժամանակին Ձեր հարցազրույցում ակնարկել էիք, եղել
է ԼՂՀ ռազմաքաղաքական ղեկավարության ձերբակալմանը նպաստողը։
Ս․թ․ սեպտեմբերի 2-ին Կ. Սարգսյանն արձագանքելով Ձեզ՝ նշել էլ. «Ես իմ մասով կարող եմ ձեզ ասել, եթե Ս. Բաբայանը ասում է, թե ինձ Հակարիի կամուրջից հետ են տվել,
ստում է։ Մեր տանը խաղաղապահ չի եղել, նախագահները մեր տնից չեն գնացել»։ Խնդրում
եմ պարզաբանում այս մասով։
- Նախ մի
կարևոր հստակեցում. խնամի-ծանոթ-բարեկամական
հարաբերությունները քաղաքականություն բերելը, և հակառակը, իմ բնավորությունը չէ։
Մի խառնեք այդ բաները իրար, դա բարոյական չէ։ Ինչ վերաբերում է «Հրապարակ» թերթի գրառումներին, ապա ասեմ, որ ես չեմ փորձել
արցախցիներին համախմբել կամ որևէ այլ հարց լուծել։ Ես երբևէ ինձ նման բան թույլ
չեմ տվել։ «Հրապարակ» թերթը՝ բոլորիս հայտնի «դեղին մամուլը», ինչպես միշտ, սխալ
տեղեկություն է տարածում։ Եվ միանշանակ պարզ է, թե որտեղից է դա գալիս, ովքեր են
պատվիրատուները։ Այդ պատճառով նման հարցերի վերաբերյալ մեկնաբանություն տալ չեմ
ցանկանում։ Եթե կա կոնկրետ փաստ՝ խնդրեմ, ներկայացրեք։ Իսկ արցախցիների համախմբման
փորձերով, կարծեմ, զբաղվում են իշխանությունները։ Էջմիածնի գործող ղեկավարը արդեն
մի քանի անգամ հանդիպել է արցախցիների հետ, և, որքանով որ ես եմ տեղյակ, այդ հանդիպումները
կազմակերպել է «Քաղաքացիական պայմանագիր» կուսակցությունը։
Կարեն Սարգսյանի և նրա գործունեության մասով. ես որևէ մեկին որևէ բանում չեմ
մեղադրել։ Ես պարզապես նշել եմ, որ, ըստ իմ ունեցած տեղեկությունների, Իվանյանում
գիշերվա ժամը 2-3-ից սկսած մինչև առավոտ համոզել են նախկին և այդ ժամանակ գործող
ղեկավարությանը, որպեսզի նրանք հավաքվեն Կարեն Սարգսյանի տանը։ Ադրբեջանցիներն էլ,
ըստ նույն տեղեկությունների, հավաքվել են այնտեղ և հենց այդ տեղից են ձերբակալել
նրանց։ Ինչ վերաբերում է Արցախի ղեկավարների անվտանգության պատասխանատուներին և
բարձրաստիճան պաշտոնյաներին, ապա ես նշել եմ ընդհանուր միտք այն մասին, որ Հակարի
կամրջի հատվածում նրանց կանգնեցրել և պահել են ադրբեջանցիները, որպեսզի
ղեկավարությունը հանձնվի։ Ես ասել եմ այն, ինչ իրականում եղել է և կա մինչ այսօր։
Իմ այդ ասածները ոչ ոք չի հերքել։
Հեղինե Մանուկյան
